Жоспар бойынша Жезқазған қаласындағы Талап ауылы, Геологический, Қостанкелдісай, Бекболатсай елді мекендерінде орталық жылу жүйесіне қосылмаған барлығы 2 мыңның үстіндегі жеке тұрғын үй газбен қамтамасыз етіледі. 2019-2020 жылдарды қамтитын газдандыру жоспары бойынша мердігер «Әлия-Сервис» ЖШС осы жылдың соңына дейін автоматты газ тарату стансасынан (АГТС) Талап ауылы мен Жезқазған қаласының Пристанционный елді мекеніне магистральды газ құбырын тартады. Сонымен бірге, Талап ауылындағы 148 үй мен мектеп, клуб сынды әлеуметтік нысандар да биыл көгілдір отынның игілігін көрмек. Қаланың қалған бөлігі кестеге сай келер жылы газ желісіне қосылмақ.
Оралдық «Әлия-Сервис» ЖШС мамандары қазір Талап ауылында ішкі газ құбырларын тартуда. Жоба бойынша әр үйге газ есептегіш құралдар орнату да қарастырылған.
– Қазір Талап ауылының ішінде орташа және төмен қысымдағы жалпы ұзындығы 6,8 шақырым газ желілерін тартып жатырмыз. Бүгінде 5,5 шақырымы тартылып болды. Ауыл ішіне орташа және төмен қысымға арналған пластик құбырлар тартылуда. Жұмыс биыл толық аяқталады, – дейді «Әлия-Сервис» ЖШС өкілі Айдос Себепов.
Мердігер компания өкілінің айтуынша, АГТС-тан Пристанционный елді мекеніне дейін 16 шақырым магистральды темір құбыры тартылмақ. Бұл жоғары қысымдағы желі болады. Қазір дайындық жұмыстары жүруде.
– Мұндағы жұмысқа барлығы 9 техника, 25 адам жұмылдырылған. Оның ішінде 10 адамды осы Талап ауылынан жұмысқа қабылдадық. Талаптағы жұмыс аяқталған соң Пристанционный бағытындағы жұмыс жанданады. Оған қосымша жұмыс күшін тартатын боламыз. Келер жылы қаланың басқа аудандарына газ жеткіземіз, – дейді компания өкілі.
Мердігер жұмысына техникалық қадағалау жүргізуге жауапты «ҚазАртҚұрылыс» ЖШС өкілі Жеңіс Әлімжан жұмыстың кесте бойынша жүріп жатқанын, техникалық талаптар мен жобалық құжаттардан ауытқушылық жоқ екенін айтады.
Екі жылға жоспарланған Жезқазған қаласын газдандыру жобасына бюджеттен 3 млрд теңге қаражат қарастырылған. Алдын ала болжам бойынша қалада бір текше метр газдың құны 47 теңгені құрамақ.
Естеріңізге салсақ, Қазақстан Республикасының Тұңғыш Президенті – Елбасы Н.Назарбаев 2018 жылғы 5 наурызда өзінің бес әлеуметтік бастамасын жариялап, онда астананы газдандыру туралы тапсырма берген еді.
Биыл наурызда алғашқы дәнекерлеу жұмыстары басталып, бүгінде бұл құбыр елордаға да жетіп қалды. Магистральды құбырдың 80 пайызы Қарағанды облысының аумағымен өтеді. Ауқымды жоба аясында Қарағанды облысында Жезқазған, Теміртау, Абай, Саран, Шахтинск қалалары мен облыстағы басқа да 114 елді мекенді газдандыру жоспарланған.
Дархан МҰХАН,
журналист
Жезқазған
