Аймақтар • 23 Қыркүйек, 2019

Диқан Думан сервистік-дайындау орталықтарының тиімділігіне тәнті

272 рет
көрсетілді
4 мин
оқу үшін

Сервистік-дайындау орталықтары Алматы облысындағы аграрлық саланың дамуына серпін беріп отыр. Көктемгі егіс пен күзгі жиын-терін кезінде шаруаға шын жанашыр болып, нақты көмек көрсететін осы орталықтарға өңір диқандары дән риза. Өйткені мемлекеттік қолдаудың арқасында шаруа­лар жыл сайын ауыл шаруашылығы дақылдарының көлемін ұлғайтып, өнім өндіру көлемін арттыруда.

Диқан Думан сервистік-дайындау орталықтарының тиімділігіне тәнті

Мемлекеттік қолдауды нақты іспен ұштастыр­ғандар қатарында «Жетісу» әлеуметтік кәсіпкерлік корпорация­сының қолдауымен құрылған сервистік-дайындау орталықтары бар. Бүгінде бұл ор­талықтар ауыл шаруашылығы өндіру­ші­лерінің қолын ұзартып отыр. Осындай қолдау құралдарының тиімділігін Қап­шағай қаласындағы «Ақөзек» сервистік-дайындау орталығының басшысы Думан Майлиханов ризашылықпен айтады. Бұл орталық 2017 жылы «Ақөзек» ауыл шаруашылығы өндірістік коопе­ративі мен «Майлиханов Д.» шаруа қожа­лығының күш біріктіруімен құрылыпты.

Ал Думан Майлихановтың өзі бүкіл өңір­ге танымал кәсіпкер. Ол Қапшағай қала­сындағы ірі шаруа қожалықтарының басшысы, Фермерлер одағының жер­гілікті филиалын басқарады және Кәсіпкерлер кеңесінің құрамына кіре­ді. Ауыл шаруашылығымен бала кезі­нен таныс. Жастайынан пияз себуге кө­мек­тесіп, трактор жүргізген. Кәсіп­кер­­дің бизнестегі үлкен тәжірибесі мен іс жүр­гізудегі инновациялық тәсілінің ар­қа­сында Қапшағай өңірінде табысты әрі ірі сервистік-дайындау орталығын құрды.

– Шаруашылықта біз әрдайым пияз, соя, арпа және қарбыз өсірдік. Қант қызылшасын жаңғырту бойынша мем­лекеттік қолдаудың жемісін көргеннен кейін біз де осымен айналысуды шештік. Сосын сервистік-дайындау орталығын құрдық. 2017 жылы 60 гектарға қызылша егілді. Нәтиже біздің күткенімізден асып түсті. Гектарынан 520 центнер өнім жиналды, – дейді диқан.

Егер екі жыл бұрын «Ақөзекте» егіс­тік көлемі 60 гектар болса, 2018 жылы тәтті түбірдің көлемі 200 гектарға дейін кеңейіп, 4 мың тоннадан астам өнім жиналды. Биыл «Ақөзек» алқаптарында қант қызылшасы 160 гектарға өсірілуде. Негізінен Қапшағайдың жазы ыстық және желді болып келеді. Қолайсыз ауа райы жағдайларына қарамастан, «Жетісу» корпорациясы арқылы сатып алынған элиталық тұқымдар өнімділікті арттыруға көмектеседі. 2018-2019 жылдары жалпы сомасы 33,3 млн теңгеге Германия мен Франциядан 640 дана егіс тұқымы сатып алынды.

– Еуропалық тұқымның ерекшелігі, олардың әртүрлі агроклиматтық жағдай­ларға бейімделуі жоғары деңгейде. Соны­мен қатар тұқымдар біздің жер қырты­сына төзімді, – дейді Думан Майлиханов.

Заманауи ауыл шаруашылығы техникасы да кәсіпкерлерге қолғабыс болып келеді. Техника жұмыс күшін азайтуға, егіс алқабын жедел дайындап, егін жинау мерзімін қысқартуға көмектеседі. Қар­жы лизингі аясында «Жетісу» әлеумет­тік кәсіпкерлік корпорациясы арқылы «Ақөзек» сервистік-дайындау орталығы жалпы сомасы 171,6 млн теңгеге 14 түрлі ауыл шаруашылығы техникасын сатып алды. Олардың қатарында қопсытқыш, бүріккіш, айналмалы соқа, дән сепкіш, трактор, тіркеме және басқалар бар.

Қожалықта тұрған Agrotron 170 сериялы DEUTZ FAHR неміс тракторы жоғары өнімділігімен, беріктілігімен және маневрлігімен ерекшеленеді және тіпті ең қиын жағдайларда да жұмыс істей алады. Мұның бәрі тракторға күні бойы дайындық жұмыстарынан бастап егіс жұмыстарына дейін, жыртудан бас­тап тасымалдауға дейін күрделі операцияларды жүргізуге мүмкіндік береді. Ал MONOSEM MECA V4 механикалық дән сепкіші қант қызылшасын егу үшін арнайы әзірленген. Себетін аппарат тереңдікті тұрақты бақылап, тұқымды жақсы орналастыру мен сапалы себуді қамтамасыз етеді.

Жалпы, қазіргі уақытта «Жетісу» әлеу­меттік кәсіпкерлік корпорациясының қол­­дауы­мен Алматы облысында қызыл­ша бағы­т бойынша 29 сервистік-дайындау орта­лығы құрылған. Оларға жалпы құны 6,5 млрд теңге болатын 603 дана ауыл ша­руа­шы­лығы техникасы сатып алыныпты.

Алматы облысы