Көп балалы отбасылар бірінші кезекте үй алады

Экология • 24 Қыркүйек, 2019

Көп балалы отбасылар бірінші кезекте үй алады

29 рет көрсетілді

Биыл көп балалы отбасыларға 8 мыңнан астам пәтер беріледі. Бұл туралы Индустрия және инфрақұрылымдық даму бірінші вице-министрі Қайырбек Өскенбаев мәлімдеді.

Бауыржан Мұқан

«Былтыр 12 млн шаршы метрден астам үй салынса, биыл көрсеткіш 13 млн-нан асады деп күтіп отырмыз. Яғни, республика бойынша жалпы саны 120 мыңдай жаңа үй салынады. Алғашқы 8 айда жалпы көлемі 7,6 млн шаршы метрден астам 68 825 жаңа үй салынып бітті. 28 210 үйді жекеменшік құрылыс компаниялары салды. Ал көпқабатты үйлер саны 37 мыңның үстінде», деді Қ.Өскенбаев.

Вице-министрдің айтуынша, үй құрылысына салынған инвестиция биыл 19 пайызға өскен. Өңірлердің барлығы дерлік жоспарға сай жұмыс істеп жатыр. Дегенмен Нұр-Сұлтан қаласында салынған үйлер былтырғыдан 33 пайызға, Маңғыстау облысында 9,5 пайызға төмендеді.

Баспасөз мәслихатында айтылғандай, 2019 жылы республикалық бюджеттен әкімдіктерде кезекте тұрған адамдар үшін 6002 сатып алусыз жалға берілетін тұрғын үйдің құрылысына 32,8 млрд теңге бөлінген. Жыл сайын кем дегенде 4 мың пәтер пайдалануға берілуге тиіс.

Көп балалы отбасылар үшін 2025 жылға дейін 40 мың жалға берілетін тұрғын үйдің немесе жыл сайын 6 мың пәтер салу жоспарланып отыр. Осы мақсатта 7 жылда 350 млрд теңге бөлу қарастырылған. «Көп балалы отбасыларға жалға 6 мыңдай пәтер беріледі. Бүгінге дейін 2813 пәтер тапсырылды. Жыл соңына дейін көрсеткіш 8 мыңға жетуі тиіс», – деген Қ.Өскенбаев көп балалы отбасыларға баспана алу үшін бөлек кезек жасау мәселесі туралы да пікірін білдірді.

«Бұрын көп балалы отбасылар жалпы ортақ кезекте тұратын. Ұлы Отан соғысының ардагерлері мен жетім балалар үшін басымдық болды. Салынған тұрғын үйдің 20%-ы соларға берілетін. 80%-ы қалған кезекке берілді. Бұл халықтың әлеуметтік осал тобының 11 санаты», – деді Қ.Өскенбаев. Оның айтуынша, биыл мамыр айында заңға түзетулер енгізілді, оған сәйкес көп балалы отбасылар жеңілдетілген баспананы бірінші кезекте алушылармен теңестірілді. Бұл бағдарламаны «Нұрлы жер» бағдарламасында жедел іске асыру үшін жеке кезек бөлінді.

Сонымен қатар бірінші вице-министр көп балалы отбасылар қатары өскенін атап өтті. «Үш жылдың ішінде біз көп балалы отбасыларды жеңілдетілген баспанамен толықтай қамтамасыз етуіміз керек. Басымдық жарияланған кезде 29 мың отбасы кезекте тұрды. Бүгінде олардың саны 38 229. Кезек айтарлықтай жылдам қарқынмен өсуде. Біз өсімді ескере отырып тұрғын үй салып жатырмыз. Сондықтан алға қойылған міндеттер толығымен орындалады», – деді Қ.Өскенбаев.

Қ.Өскенбаев Жастар жылы аясында жұмыс істейтін жастарға да арнап үш мегаполисте 3 мың жалдамалы пәтер салынып жатқанын айтты. 2021 жылға дейін көрсеткіш 9 мыңға жетпек.

«Тұрғынүйқұрылысжинақбанкі» АҚ басқарма төрайымы Ләззат Ибрагимованың айтуынша, биыл ашылған «Бақытты отбасы» бағдарламасы бойынша әлеуметтік аз қамтылған отбасыларға 10 пайыз бастапқы төлеммен жылдық 2 пайыз үстемемен жеңілдетілген ипотека беріледі. Бағдарламаға қатысу үшін отбасының әр мүшесіне шаққанда табыс айына 42 мың 500 теңгеден аз болуы керек.

«Бүгінге дейін бағдарлама бойынша «Тұрғынүйқұрылыс-жинақбанкіне» 5 мыңдай өтінім түсті. Соның 2,5 мыңына ипотека мақұлданды. Ал 455 отбасы жаңа үйлеріне қоныс аударып үлгерді. Жыл соңына дейін бағдарлама бойынша 5 мың қазақстандыққа жаңа пәтердің кілті табысталады», – деді басқарма төрайымы.

Ләззат Ибрагимованың айтуынша, «Бақытты отбасы» бағдарламасы бойынша 10 пайыздық алғашқы төлем болмаса, Нұр-Сұлтан қаласы мен Ақтөбе облыстарында 1 млн теңгеге дейінгі тұрғын үй сертификаты бар.

Жалпы, бағдарлама бойынша Нұр-Сұлтан қаласы (800 өтінім) мен Алматы қалаларынан (650 өтінім) және Ақтөбе облысынан (542 өтінім) ең көп өтінім түскен.

Күннің маңызды және өзекті жаңалықтарын «Егемен Қазақстан» телеграм каналынан оқыңыз