Шараның ашылуына Қазақстандағы Эразмус+ ұлттық бағдарламасы кеңсесінің директоры Шайзада Тасболатова, Нархоз университетінің ректоры Эндрю Вахтель, Каталония Саяси университетінің координаторы Винченс Фернандес қатысты.
Форум университеттерді интернационалдандыру жолдарын құру, халықаралық және мәдениаралық түсіністік, инновациялық технологияларды қолдану арқылы интернационалдандыруды дамытудың жоғары сапалы стратегиясын жасау мақсатында қолға алынған. Халықаралық конференция аясында отандық және шетелдік мамандар ЖОО-ларды интернационалдандыру жөнінде баяндама жасады, сондай-ақ «Интернационалдырудың стратегиялық жоспарын әзірлеу» және «Шетелдік студенттер мен оқытушылар үшін «WELCOME» жағдайларын жасау» тақырыбында екі секцияға бөлінген дөңгелек үстел ұйымдастырылды.
Жиынның ашылуында сөз алған Л.Н.Гумилев атындағы Еуразия ұлттық университетінің Халықаралық байланыстар және инновациялар жөніндегі проректоры Ақбота Ниязқызы шетелдік қонақтарға шараны ұйымдастырушылардың бірі саналатын университеттің тарихына қысқаша тоқталып өтті. «Университетіміз 1996 жылы Елбасы Н.Назарбаевтың бұйрығымен құрылды. Жас жоғары оқу орны болғанына қарамастан, халықаралық рейтингтерде алдыңғы қатардан көрініп келеді. Ал жоғары білімді интернационалдандыру университетімізді дамытудың басты бағыты саналады. Бұл бойынша жұмыстарды тұрақты және жүйелі түрде жүргізіп келеміз», деді А.Ниязқызы. Оның мәлімдеуінше, аталған ЖОО әлемдегі 25 елдің студенттеріне «Alma mater», яғни білім беретін орын болып тұр. «Халықаралық ұйымдармен әріптестікте жүзеге асырылған жобалар жетерлік. Соның ішінде айрықша атап өтетініміз – Эразмус+ бағдарламасы. Университетіміз жоғары білімді интернационалдандыруда жоғары нәтижеге жеткізген бұл бағдарламаға 2015 жылдан бастап қатысты. Осы уақыт ішінде 200-ден аса адам бағдарламаға қатысып, Еуропаның 36 елінде тағылымдамадан өтті», деді проректор.
Ал халықаралық білім беру жөніндегі америкалық кеңестің өкілі Мақсат Қошқарбаев жоғары білімді интернационалдандыруда шетелдік университеттермен бірлікте жұмыс істеудің маңызына тоқталды. «Қазақстандық ЖОО-лардың Америка университеттері арасындағы әріптестік арқылы бірқатар жоба іске асырылып, еліміздің жастары үшін гранттар қарастырылды. Біздің кеңес студенттердің халықаралық дәрежеде білім алып, әлемдік стандарттарға сай маман болуын қамтамасыз етумен ғана емес, профессорлар мен оқытушылардың өзара тәжірибе алмасуына, сонымен қатар рейтингі жоғары ғылыми журналдарға ғалымдардың мақаласын жариялауға жағдай жасайды», дейді М.Қошқарбаев.
