Офицерлік топ делегациясын «Оңтүстік» өңірлік қолбасшылығының орынбасары, полковник Ниязтай Әлкешев пен Қазақстан Республикасы Ұлттық ұланы тәрбие және әлеуметтік-құқықтық жұмыстар бас басқармасының бастығы, полковник Александр Крамар бастап барды. Сондай-ақ делегация құрамында Халық қаһарманы Қайрат Үмбетов пен әскери саладағы жауынгерлік ерлігі үшін түрлі орден, медальдарға ие болған офицерлер – подполковник Ержан Баймолдин, аға лейтенанттар – Ербол Отарбаев, Жандос Баянбаев және лейтенант Сырым Сүндетов те болды.
Әскерилер делегациясының негізгі мақсаты – аталған білім ордаларында Ұлттық ұланның қоғамдық қауіпсіздік саласындағы қызметін ел ішіне кеңінен насихаттай отырып, жасөспірімдерді әскери-патриоттық рухта тәрбиелеуге үндеу болып табылады. Сонымен қатар жастардың отансүйгіштік сезімін қалыптастыру жолында Ұлттық ұлан жанынан құрылған «Жас бүркіт» клубының жұмысына оқушыларды көптеп тарту.
Кездесу аясында сөз алған Қазақстан Республикасы Ұлттық ұланының тәрбие және әлеуметтік-құқықтық жұмыстар бас басқармасының бастығы, полковник Александр Крамар Ұлттық ұланның бүгінгі таңдағы қызметімен таныстыра келе әскерилердің жауынгерлік ерлігі туралы айтып берді.
«Біздің ұландық офицерлер арасында өзінің өмірін қауіп-қатерге тігіп, ерліктің үлгісін көрсеткен әріптестеріміз аз емес. Олардың саны бүгінгі таңда 170-ке жуықтайды. Бұл азаматтардың барлығы да өздерінің ерлік іс-қимылдарымен өзгенің өміріне араша түскен бейбіт күннің батырлары. Сондықтан да оларды біз мейлінше қоғам арасында кеңінен насихаттап, жастарға үлгі етіп көрсете бергеніміз жөн», деді ол.
Жиында 6506 әскери бөлімінің командирі, полковник Қайрат Үмбетов бастаған әскерилердің дәрісі бұдан былай тұрақты түрде ұйымдастырылып тұратындығы айтылды.
«Жасөспірімдер арасында болып тұратын келеңсіз жағдайлар қоғам назарын өзіне аударуда. Біз келешекте осындай келеңсіздіктердің алдын алуға әскери азамат ретінде өз үлесімізді қосайық деп, Ішкі істер министрі мен Ұлттық ұлан бас қолбасшылығының жоспарына сай тың бастамамен мектептерге барып жатырмыз. Яғни ерліктің үлгісін көрсетіп, жоғары марапатқа ие болған әскери бөлім офицерлерінің қатысуымен оқушыларға әскери-патриоттық рухты ояту ниетімен арнайы дәрістер өткізуді бастадық», деді Халық қаһарманы Қ.Үмбетов.
Ерлік жасаған ұландық әскерилердің мұндай бастамасын қаладағы білім ошақтарының басшылары да қоштап отыр.
«Бізге және біздің оқушыларымыз үшін бүгінгі күн батырларының өздері жүргізген дәрістер өте қызық әрі шынайы. Сондықтан да біздің мектепке кеудесіне Елбасының өзі орден-медаль таққан кейіпкерлердің келуі зор мәртебе. Атап айтқанда, әскери салада еткен ерен еңбегі мен ерлігі үшін «Айбын» орденімен марапатталған подполковник Ержан Баймолдин, аға лейтенанттар Жандос Баянбаев және Ербол Отарбаев, «Жауынгерлік ерлігі үшін» медалінің иегері атанған лейтенант Сырым Сүндетов сынды азаматтардан жасөспірімдер үлгі алады деп үміт артамыз», дейді Ы.Алтынсарин атындағы №65 мектеп-гимназия директорының міндетін атқарушы Айгүл Керімбаева.
Айта кетейік, аталған іс-шара аясында 6506 әскери бөлімінің басшылығы мен №46 және №65 мектеп директорлары арасында өзара әріптестік меморандумы бекітілді. Соның аясында алдағы уақытта әскери бөлім офицерлері мектеп оқушыларына барып арнайы дәріс оқып, кездесу ұйымдастырып тұратын болады. Оған қоса, оқушыларды әскери саланың қыр-сырымен жақынырақ таныстыру мақсатында 6506 әскери бөлімінің ашық есік күндерін ұйымдастыру көзделеді.
Естеріңізге сала кетейік, биылғы оқу жылының басында шымкенттік бір топ мектеп оқушыларының қатысуымен төбелес болып, ол қоғам назарын өзіне аударған еді. Алдағы уақытта мұндай келеңсіздіктердің алдын алу мақсатында Ұлттық ұлан офицерлері оқушылардың сыныбына барып сабақ өткізуді қолға алады.
