Кездесу барысында Бас хатшы Қырғызстан басшысына алдағы 15 қазанда Бакуде өтетін кезекті 7-ші ТМЫК саммитіне дайындық туралы, сондай-ақ Түркі кеңесі хатшылығының мүше елдері арасындағы түрлі саладағы ынтымақтастықты институттық дамыту бойынша жүргізетін негізгі жұмыстары туралы хабарлады.
Б.Әміреев Президент С.Жээнбековті бүгінгі мүше елдерде Түркі бірлігі күні ретінде атап өтілетін ТМЫК құрылуының 10 жылдығымен және Қырғызстанның Ұйымға төрағалығының жемісті әрі сәтті аяқталуымен құттықтады.
Президент Сооронбай Жээнбеков алдағы келе жатқан Түркі Кеңесінің мерейтойлық саммитінің маңыздылығын атап өтіп, Өзбекстанның Түркі кеңесіне толыққанды мүше болып кіруіне, сондай-ақ Ұйым мүшелігінің кеңеюіне үлкен разылық білдірді. Сонымен қатар ТМЫК-ның Будапештте Еуропалық кеңсесінің ашылуына және басқа да халықаралық ұйымдармен ынтымақтастықтың барысына зор қанағаттанушылығын айтты.
Қырғызстан Президенті Түркі кеңесі хатшылығы жұмысының өнімділігін бағалап, ынтымақтастықтың жаңа институттары – Түркі сауда-өнеркәсіп палатасының, Инвестициялық қорының құрылуы бойынша жүргізіліп жатқан жұмыстардың маңыздылығын атап өтті.
Тараптар кездесу барысында алдағы саммиттің күн тәртібіндегі мәселелерді жан-жақты талқылап, Түркі кеңесі аясындағы Қырғыз Республикасымен ынтымақтастық перспективалары бойынша пікір алмасты.
«Егемен-ақпарат»
