Салтанатты түрде ант қабылдады

Қазақстан • 08 Қазан, 2019

Салтанатты түрде ант қабылдады

Нұр-Сұлтан, Алматы, Шымкент және Қарағанды қалаларының барлық «Жас ұлан» республикалық әскери мектептерінде тәрбиеленушілер ұлан антын қабылдады. Салтанатты іс-шараға Қарулы Күштердің ардагерлері, тәрбиеленушілердің ата-аналары қатысты.

Жолдыбай БАЗАР

Елордада орналасқан армия генералы С.Қ.Нұрмағамбетов атындағы «Жас ұлан» республикалық мектебіне қабылданған 237 тәрбиеленуші салтанатты түрде ант қабылдады. Дәстүр бойынша ұландар Кеңес Одағының Батыры, Халық қаһарманы, армия генералы Сағадат Нұрмағамбетовтің ескерткішіне гүл шоқтарын қойды.

Іс-шара ұландарды алаңға тұрғызудан және мектеп туын кіргізуден басталды. Әскери мектеп тәрбиеленушілерінің маңызды оқиғасымен Қорғаныс министрінің орынбасары, генерал-майор Тимур Дәндібаев құттықтады.

«Сіздер әрқашан тек кәсіпқой әскери қызметшілер ғана заманауи Армияның негізін құрайтындығын есте сақтауларыңыз қажет. Жас болғандарыңызға қарамастан, сіздер дұрыс жолды таңдадыңыздар. Адамның есеюі қоғамда өз орнын табумен, бастысы болашақ мамандықты таңдауға тікелей байланысты. Бұл үдерістен қалай өтетіндеріңіз сіздердің алдағы тағдырларыңызды айқындайды» деп атап өтті.

Ант қабылдау

Бұдан кейін ұландар ант берді. Ант мәтінінде «Мен әскери мектеп тәрбиеленушісінің ары мен абыройын ардақтауға, мүлтіксіз тәртіп пен әскери кішіпейілдік ережелерін сақтауға, бар ынтаммен Отанымыз – Қазақстан Республикасын қорғауға өзімді дайындауға ант етемін», деп жазылған.

Салтанатты іс-шараның соңында барабаншылар ротасының ұландары барабандарымен дефиле көрсетсе, 4-ші оқу ротасының тәрбиеленушілері қоян-қолтық ұрыс тәсілдерін, ал 2-ші оқу ротасының ұландары қарумен өз қойылымдарын ұсынды.

Бұдан кейін ата-аналар мен келген қонақтар әскери мектептің оқу-материалдық базасымен, сондай-ақ тұрғылықты жағдайымен танысты.

Ант беру уәдесін Шымкент қаласы мектебінің 200-ден аса ұландары да қабылдады. Тәрбиеленушілер әскери мектептің аты берілген Кеңес Одағының Батыры Сабыр Рақымовтың ескерткішіне гүл шоқтарын қойды. Сондай-ақ бұл күні Кеңес Одағының екі мәрте батыры Т.Бигелдинов атындағы Қарағанды «Жас ұлан» республикалық мектебінің 225 ұланы ант қабылдады.

Білім алушылар стандартты мектеп сабақтарымен қатар әскери пәндерді, оның ішінде жалпыәскери тактиканы, байланыс негіздерін, саптық дайындықты, жалпыәскери жарғыларды және т.б. меңгеретіндігін айтып өткен жөн. Ұландар әскери пәндердің сыныптарындағы әскери техника мен қару-жарақтың үлгілері бойынша зерттелетін материалды іс жүзінде бекіте алады.