Қоғам • 10 Қазан, 2019

Зияткерлер зейнеткерлерге құрмет көрсетті

13 реткөрсетілді

Назарбаев зияткерлік мектептерінде ұзақ мерзімді қамтитын «Ұрпақтар сабақтастығы» жобасы өз жұмысын бастады.

Жобаның мақсаты – зейнет жасындағы қариялар мен зият­­кер оқушылардың арасында қарым-қатынас орнату, жалғыз тұратын қарттарға септесіп, мектеп өміріне араласуына ықпал ету. Шаңырақ оқушыларымен бірлескен шығармашылық жұ­мыс­тар істеу арқылы ұлттық құн­дылықтарды дәріптеуде қариялар мен жас ұрпақтың саба­қ­тас­тығын қалыптастыру, ру­хани мәдениетін көтеру, адамгер­шілікке, еңбекке тәрбие­леу.

Жуырда зияткерлік мектептер оқушылары мен ұжымдары бір адамдай дайындалып, Қарттар күніне орай осы ауқымды жобаны қолға алған. Осы орайда Ақтаудағы NIS қарияларға ізет көрс­ету мақсатында «Ұрпақтар сабақтастығы» фотокөрмесін ұйым­дастырды. Мектептің бас дәлізінде балалардың ата-әже­ле­рімен түскен суреттері қаз-қатар ілініп, ыстық лебіз білдіру тақ­тай­шасы орнатылыпты.

Қызылор­далық зияткерлер айма­қтағы түрлі салаларда қызмет еткен зейнеткерлерді шақы­рып, қариялардың өмір жо­лын­дағы көрген қызық-қуа­ныш­­тары, жеткен жетіс­тік­тері туралы әңгімелерін тыңдап, меймандарға мерекелік концерт ұйымдастырды, өз қолдарымен жасаған сый-сияпаттарын үлес­тір­ді. Ал Талдықорғандағы зияткерлік мектеп Алматы облы­сының мамандандырылған меке­мелері арасында өзара ынты­мақ­тас­тық туралы меморандумға қол қойып, еріктілер қозғалысын кеңейтуге және оқушылардың жаһандық жауапкершілігін артты­руға бағытталған әлеу­мет­тік жо­баларды жүзеге асыруға бекі­­ніп отыр.

Сондай-ақ Петропавл қала­сындағы мектеп «Көпті көр­ген көнемін!» атты іс-шара ұйым­дас­тырып, облыстағы ардагер ұстаздарды қонаққа шақырған. Оларға мектепішілік экскурсия жасалып, оқушылар өз өнер­ле­рін көрсетті. Өскемендегі зият­кер­лік мектеп «Біз біргеміз» қайы­рым­дылық акциясын бастап, «Солнечный» кентіндегі қарттар үйіне үстел ойындары мен әдеби кітап­тар жинауды қолға алса, Семейдегі NIS жобаны ерекше форматта бастауды жөн көрген екен. Олар мектептің акт залында «Мейірімділік пен құрмет күні» атауымен 11-сынып оқушылары мен пе­дагог-ұйымдастырушы-кураторлар концерттік эле­мент­­тері аралас ток-шоу ұйым­дастырған. Қонақтарға түрлі өнер үйірмелерінің тәрбие­лену­­ші­лері дайындаған сахналық қойы­лымдар тарту етілген.

Алматы қаласындағы химия-биологиялық бағытта білім бере­тін оқу ордасы «Қарттарым – асыл қазынам» тақырыбымен таңғы брифинг ұйымдастырып, аға буын өкілдеріне арнап ән айтып, шабыттана өлең оқыды. «Атам мен әжемнің шеберханасы» деген атаумен елордалық физика-математикалық бағыт­тағы мектеп шеберлік сағат­та­рын ұйымдастырды. Ал Орал қаласындағы зияткерлік мек­теп оқушылары бұл күні зағип жандардың үйлеріне барып, көмек қолдарын созған. Соны­мен қатар жуық арада қарттар үйіне барып, «Қазақ әндері» жобасымен таныстыратын болады.

Тараздықтар 50-ге жуық жал­ғыз басты қарт пен әлеуметтік орта­лық өкілдерін білім ордасына шақырып, қолөнер бойынша шеберлік сағаттарын өткізді. Павлодар, Атырау, Көк­ше­тау, Қостанай, Қарағанды мектептері де Қарттар үйі мен арнайы пансионаттарға барып, өз өнерлерін көрсетіп, қолөнер бұйымдарын жасау бойынша, түрлі шеберлік сағаттарын өткі­зуді, ақтөбеліктер қарттар үйін­де спорттық сайыстар ұйым­дастыруды, ал Алматы қала­сы­ның физика-матема­ти­калық бағыттағы мектеп оқушы­ла­ры қарттар үйінде сенбілік өткізуді жоспарлап отырған көрінеді.

– Қоғамдағы қариялардың орны мен рөлін көтеріп, қарттар мен оқушылар арасында ұрпақтар сабақтастығының нығаюына ықпал етуге тырысамыз, – дейді Зияткерлік мектептерді дамыту департаменті директорының орынбасары Аида Ағаділ. – Егде жастағы адамдардың эмоци­о­налды жағдайының жақса­руы, күнделікті өмірдегі белсен­ді­­ліктерін арттыруға, жалпы во­лон­терлік қозғалысты кеңей­ту­де зияткерлік мектептер тарапы­нан үлес қосылса деген ойы­мыз бар.

­Біздіңше, бұл жоба арқылы балалар ұрпақтар сабақтастығын жалғап, қайырымдылық іс-әрекеттері арқылы үлкендерді сыйлауды, қажет кезде қолғабыс беруді, ең бастысы, ата-анасына қамқор болуды үйренеді.

 

Баннер
Соңғы жаңалықтар

Ұқсас жаңалықтар