Қазақ оқырмандарына рухани олжа салған санаткермен кездесуге жиналған жұрттың қатары көп болды. Жазушы Еркінбек Тұрысов, белгілі ақын Нармахан Бегалиев бастаған ел ағалары мерейтой иесінің өмірі мен шығармашылығы туралы сыр шертті.
Кездесу барысында кітап оқу мәдениеті төмендеп бара жатқан тұста оқырманның сұранысына орай сауатты, тың туындылар жазған қаламгердің еңбектері жайлы ғибратты әңгіме шертілді.
Жазушы үшін ең үлкен сыйлық аталған кітапхана ғимараты ішінен өзінің музей-кабинетінің ашылуы болды.
«Негізі оқырмандармен кездесуге шақырған еді. Бірақ осындай тосынсый жасап отыр. Әлемнің 20 елінде болсам да, мұндай құрмет көрген жоқпын. Қазір елордада тұрамыз, алдағы уақытта отбасымызбен туған жерге көшіп келіп, қызмет етуді жоспарлап отырмыз. Келешекте бұл бөлме керемет сұхбат алаңына айналады деп үміттенемін. Осы істі ұйымдастырған «Отырар» кітапханасының басшылығына алғысымды білдіремін», деді тебіренісін жасыра алмаған ағамыз.
Тыңдарманның құлақ құрышын қандырып, оқырманға терең ой салған кеш соңында ол жастарға және қоғам мүшелеріне рухани құндылықтар сыйлайтын «Мейірім», «Жазбаша тренинг» атты жаңа кітаптарын таныстырды. Автордың айтуынша, бұл кітаптар жақын арада ауқымды таралыммен жарыққа шықпақ. Ал бұдан былай жазушының шығармасын іздеушілер музей-кабинетіне келіп, барлық кітаптарын оқи алады. «Ақыл қалтадан» бастап жуырда ғана жарық көрген «Жетілудің 7 жолы» атты еңбегіне дейін осында қойылған.
Автор жоғарыда аталған шығармаларынан бөлек, ізгілік пен имандылыққа, білім мен парасатқа үндейтін кітаптар жазып, қытай ғұламалары Лао Цзы ілімі мен Конфуций трaктaттaрын тәржімалаған болатын.
Бұл игі іс-шара автордың 70 жылдық мерейтойына үлкен тарту болды.
ШЫМКЕНТ
