Қазақ дастарқанынан дәм татты

Қазақстан халқы Ассам­блеясының (ҚХА) «Қазақтану» жобасы аясында қолға алынған іс-шараны биыл қалалық ҚХА мен Әдет-ғұрып және салт-дәс­түр орталығы бірлесе ұйым­дастырды.

Төртінші жыл қатарынан өткізіліп отырған шарада шым­­­кенттік 11 этномәдени бір­лестік өз талғамдары бойынша қа­зақтың ұлттық тағамдарын да­йын­дап, қазақ дастарқанын жайды әрі дайындаған тағамдардың та­ным-тарихына үңіліп, ас әзір­леудің әдіс-тәсілін келген қо­нақтарға таныстырды. Жайыл­ған дастарқаннан дәм татқан көп­шілік оның ынтымаққа бас­­тайтын қадір-қасиетіне де қанықты.

– «Рухани жаңғыру» бағ­дар­ламасы аясында жүзеге асып келе жатқан бұл іс-шара қазақ мә­дениетін, тарихын, филосо­фия­сын наси­хаттауға бағытталған. Осы ар­қылы қаладағы этнос­тарды мемлекет құраушы қа­зақ халқының маңайына топ­тастыруды, ұлтымыздың қонақ­жайлық дәстүрін дәріптеп, ру­хани құндылықтарымызды жаң­ғыртуды көздеп отырмыз. Қазақтың ас мәзіріндегі ұлттық тағамдардың сан алуандығын жұртшылыққа көрсету де бас­ты мақсатымыз, – дейді жиында сөз алған Шымкент қалалық Қазақстан халқы Ассамблеясы төр­ағасының орынбасары Мұрат­әлі Қалмұратов.

Іс-шараға белсене қатысу­шы­лардың бірі – Шымкент қа­лалық әзербайжан этномәдени бірлестігі төрағасының орынбасары Арзу Гурбонова. Ол – қиын-қыстау кезеңде ата-бабаларын аштықтан аман алып қалған қазақ дастарқанына ерекше құрметпен қарайтынын айтады.

– Сонау тар заманда күш­теп қоныс аударылған мил­лиондаған этносты қазақ халқы өз үйі­не қабылдап, бір үзім нанын бөліп берді. Біздердің ата-баба­ларымызды бөтенсімей, өз балаларымен бірге бір дастар­қаннан, бір ыдыстан дәм та­т­қызды. Жергілікті халықтың дар­қандығының арқасында бү­гінгі бейбіт күнге де жеттік. Сон­­дықтан біз қазақ халқына алғыс айта отырып, қазақ дастар­қа­нының қадір-қасиетін ерекше бағалаймын, – дейді ол.

Көрме-фестиваль аясында көпшілік бауырсақ пісіру мен таба нан жабудың тәсілдерімен та­нысты. Сонымен қатар асық ату, ләңгі тебу, арқан тарту се­­­кілді қазақтың ұлттық ойын түр­­­лері мен этномәдени бір­­лес­тіктер жанындағы өнер ұжым­­­дары да­­йындаған кон­церт­тік бағ­дар­ламаны тамашалады.

Естеріңізге сала кетейік, «Қа­зақ дастарқаны» фестивалі өңір­лік Қазақстан халқы Ассам­блеясының бастамасымен 2015 жылдан бері өткізіліп келе­ді. Өткен жылдары фестиваль аясында этнос өкілдері қазақ­тың ұлттың тағамы ет асудан ше­бер­ліктерін көрсетіп, қазақ­­тың ұмыт бола бастаған ұлт­тық та­ғамдарын дайындаудан са­йысқа түскен болатын.

 

ШЫМКЕНТ