Қалалық «Ынтымақ» этносаралық мәдени бірлестігінің төрайымы Гаухар Төлепова мерекенің ерекшелігіне тоқталып, рухани жаңғыруға бастайтын игі шаралар алдағы уақытта да өз жалғасын табатынын жеткізді.
«Мизам» – мал семіріп, егін орылып, қысқа азық толық жиналып берекеге кенелетін сәтте аталып өтетін мереке. Ертеде бұл мереке қыркүйек айының соңғы күндерінен басталып, қазан айының ортасына дейінгі шуақты күндерде тойланатын болған. Жалпы, халқымыздың әр мерекесі ерекше мәнге ие. Оны бүгінгі жастар біліп, жалғастырғаны жөн», дейді Г.Төлепова.
Жиында қарынға май салып, ет сүрлеген ақ жаулықты аналар көне дәстүр бойынша тағамдарды қысқа дайындаудың жолдарын көпшілікке таныстырса, қолөнершілер шеберлік сабақтарын ұйымдастырды.
Мерекелік жиын әрі қарай Политехникалық колледжде этнос жастарының қатысуымен «Тілге құрмет – елге құрмет» тақырыбындағы мәжіліспен жалғасты.
Айта кетерлігі, «Ынтымақ» этносаралық мәдени бірлестігі өңірімізде 1996 жылдан бері жұмыс істейді. Қаладағы саны аз этностардың басын біріктірген ұйым осындай іс-шаралар арқылы қазақ халқының салт-дәстүрі мен мәдениетін насихаттап, дамытуға сүбелі үлес қосып келеді.
