Холдингтің баспасөз қызметінің хабарлауынша, кен құрамындағы мыстың орташа мөлшері 0,91 пайызды құрайды, бұл да жоспарланған межеден 1,8 пайыз жоғары.
– 2019 жылдың 9 айында «Қазақмыстың» байыту фабрикалары 22,8 миллион тонна кенді өңдеді. Былтыр осы кезеңде 22,5 миллион тонна кен өңделген болатын. Яғни, биылғы жұмыс көлемі 368 мың тоннаға артық, – дейді компанияның баспасөз қызметі.
Холдингтің директорлар кеңесінің төрағасы Эдуард Огайдың айтуынша, жыл соңына дейін биылғы жоспарды асыра орындау жоспарланып отыр.
– Былтырғы көрсеткішті де, биылғы жоспарды да басып озамыз. Себебі былтыр екінші рудотермиялық пеш іске қосылды. Геологиялық барлау жұмыстарын да жалғастырамыз. Мыс пен түсті металл кеніштері ашылатын 5 болашағы зор учаскеде жұмыс істеп жатырмыз, – дейді ол.
Алдағы уақытта компания кен байытудың бүгінгі техникалық талаптарға сай жаңа деңгейіне көшпек.
«Қазақмыс» еліміздегі табиғи ресурс өндіру және қайта өңдеумен айналысатын ең ірі компаниялардың бірі екенін айта кетейік. 13 кеніштен кен өндіретін холдинг құрамында 4 кен байыту фабрикасы, 2 мыс балқыту зауыты мен 2 көмір разрезі бар. Бүгінде «Қазақмыста» 38 мыңға тарта адам жұмыс істейді.
