Құрметті Қазақ елі!
Елбасы бастаған тарихи кезеңдегі бетбұрыс баянды болсын! Жаңа жетістіктер жақсылыққа жетелесін!
Ел Президенті Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауы – елдің саяси жаңғыруына жасалған сәтті қадам.
Сындарлы диалог пен ашықтық – мемлекетті өркениеттілікке бағыттайтын басты темірқазық.
«Күшті Президент – ықпалды Парламент – есеп беретін Үкімет» саяси формуласы мен «Халық үніне құлақ асатын мемлекет» тұжырымдамасы – мемлекет тұрақтылығының іргетасы.
Билік пен халық арасындағы алтын көпірге айналған бұл құжат – тәуелсіз Қазақ елінің кемелді келешекке деген көркем сенімі.
Қасиетті Жиделібайсында, Мырзашөлдің төрінде, алтын алқапты мақтаның отаны Мақтааралда, жартығасырлық мерейтойын тойлағалы отырған Жетісай қаласында орналасқан «Сырдария» университеті заманауи сұранысқа ие, бәсекелестікке қабілетті, жоғары білікті мамандар даярлайды.
Бұл оқу ордасы – күнгейлік жастардың білім күмбезі. Ал жастар – қоғамның қозғаушы күші, елдің тірегі, мемлекеттің ең белсенді бөлігі.
2020 жылдың Волонтер жылы болып жариялануы жастарға ерекше серпін сыйлады. Ерікті түрде қайырымдылық жасау, өзгеге сәуле сыйлау – адамгершіліктің ең асыл үлгісі.
«Сырдария» университетінің профессор-оқытушылары мен студенттері сіздерді Жолдауды қолдауға және белгіленген міндеттер мен іс-шараларды бірлесе атқаруға шақырады!
Ұлы даланың жаңғыру мен жаңару жолындағы жаңа белестерді бірге бағындырайық!
18.10.2019 жыл
Түркістан облысы,
Жетісай қаласы,
«Сырдария» университеті
Еліміздің ең оңтүстік қиырында, Өзбекстан мемлекетімен шекаралас Жиделібайсын жерінде, ақ алтынның отаны – Жетісай қаласында орналасқан «Сырдария» университеті Сіздің халыққа арналған «Сындарлы қоғамдық диалог – Қазақстанның тұрақтылығы мен өркендеуінің негізі» атты тұңғыш Жолдауыңызды еліміздегі жоғары оқу орындары арасында алғашқылардың бірі болып талқылап, 2019 жылдың 18 қазанында халықаралық ғылыми-тәжірибелік конференция өткізді. Осы жиында Жолдаудағы басты бағыттарды жүзеге асыруға байланысты мақсат-міндеттер айқындалып, қарар қабылданды.
«Сырдария» университеті құрылғаннан бергі 22 жылда Өзбекстан Республикасындағы 1 млн-нан астам қандастарға және Мырзашөлдегі 500 мыңдай халық үшін мектеп мұғалімдерін даярлап, жастарға жоғары білім беруде. Материалдық-техникалық базасы заманауи талапқа сай жабдықталған университет контингенті мемлекет құраушы ұлт өкілдері болғандықтан негізгі басымдық ағылшын тілін игеруге бағытталуда. Осы мақсатта Кембридж университетінде біздің оқу орнының орталығы ашылды. Профессор-оқытушылар мен студенттер айтулы ғылыми жетістіктерге қол жеткізуде. Археологтар бұрын-соңды зерттемеген ортағасырлық Ұтырлы (Үтіртөбе) қаласына археологиялық зерттеу жұмыстарын біздің университет ғалымдары жүргізіп, ғылыми айналымға енгізді. Жаратылыстану бағытында оқитын студенттер түрлі ғылыми байқау мен жобалардан жеңімпаз болып оралуда. Студенттеріміздің спорт пен өнерде жеткен табыстары да қомақты. Бітіруші түлектер түгелдей жұмыспен қамтылған.
Білім-ғылым іздеген Жетісай, Мақтаарал аудандарының жастары мен Өзбекстандағы қандас бауырларды жаңа өмірге жетелеуде «Сырдария» университетінің ұжымы Президенттің саясатын басшылыққа алады.
Халықаралық конференцияға қатысушы ғалымдар, профессор-оқытушылар және «Сырдария» университетінің студенттері Қазақстан ЖОО профессор-оқытушылары мен студенттеріне Президенттің Жолдауын басшылыққа алуға, белгіленген міндеттер мен іс-шараларды тыңғылықты бірлесе атқаруға шақырып, үндеу қабылдады.
Мемлекет басшысының ел болашағы мен Отанымызды көркейту жолындағы қызметіне абырой, мықты денсаулық, сарқылмас шабыт, айтулы табыс тілейміз.
Құрметпен, «Сырдария»
университетінің ұжымы
18.10.2019 жыл
Түркістан облысы,
Жетісай қаласы,
«Сырдария» университеті
