Қазақстанның еңбек сіңірген қайраткері, белгілі мүсінші Бақытжан Әбішевтің шығармашылығы мәдени қоғам мен көрермендерге жақсы таныс. Қазақ халқының тарихы, ұлтымыздың көрнекті қайраткерлерінің тағдыры мүсіншіге етене жақын. Суретші оны өзінің басты тақырыбы ретінде санайды. Ол ұзақ жыл тарихи тұлғалар мен ұлттық батырлардың бейнелерін қалпына келтіруге үлкен үлес қосып келеді.
Суретші Бақытжан Әбішевтің ел көңілінен шыққан мүсіндік тақырыптары мен сюжеттері қазақ тарихы мен халық өмірі және салт-дәстүрімен тығыз байланысты келеді. Автордың өз шығармаларын жасауда әртүрлі композициялық және көркем пластикалық мәнерлі құралдар мен әдістерді пайдаланатынын айту ләзім. Мүсіншінің жүрегіне жақын, жылылыққа толы «Ананың портреті» шынайы өмірден негіз алғанын бағамдар едіңіз. Кеңдік пен пластикалық қуатқа толы «Күйші» бейнесі, халқын ерлік істерге үндеген «Ұран» ескерткіші жас ұрпақты ерлікке, ұлылыққа шақырғандай болады. Ал қазақ батырларының күші мен ептілігі «Ұмай», «Томирис», «Беташар», «Бүркітші», «Батыр» бейнелерінен жақсы көрініс береді.
Мүсіншіні 1970 жылдан бастап студенттік, республикалық, халықаралық көрмелердің тұрақты қатысушысы, көрнекті монументалдық жұмыстардың авторы ретінде білеміз. Ол қазақ халқының батырларына арнап қойылған көптеген ғажайып ескерткіштің авторы. Б.Әбішев Алматы қаласында Жамбылға, Тоқаш Бокинге, Ақтөбеде Әлия Молдағұловаға, Бұқар жырауға, Мәшһүр-Жүсіп Көпейұлына, Баянауылда С.Торайғыровқа, Қарағанды қаласында Сәкен Сейфуллинге қойылған ескерткіштерді мүсіндесе, сонымен қатар Алматыдағы Әл-Фараби, Махамбет, Күләш Байсейітова, жазушы Әди Шәріпов, Нұр-Сұлтан қаласындағы Ататүрік, Жаяу Мұса тұрпаттарын бейнелеген. Станок жанрының жаңқаланған жұмыстары қазақстандық және шетелдік музейлерде ерекше бағаланады. Бүгінде мүсінші, суретші Б.Әбішевтің «Олимпиадашы» атты өзгеше еңбегі Швейцарияның Лозанна қаласындағы олимпиадалық комитеттің штаб-пәтерінде тұрғанын көп адам біле бермеуі мүмкін. Оның соңғы жылдары істеген ірі туындысы – ЮНЕСКО шеңберінде аталып өткен Махамбет Өтемісұлының 200 жылдығына арналған «Исатай мен Махамбет» монументалды кешені деуге болады.
Мүсінші шығармалары тас пен қола дәуірінің ой сезімін шығармашылық жасампаздықтың ұлы екпінінде біріктіре отырып, мәңгілікке шақырады. Салқар даланың сырнайлы үніндей әдемі бір әуен келетіндей дерсіз. Әлденені аңсап сағынасыз.
АЛМАТЫ
