Спорт • 31 Қазан, 2019

Елдос екінші орынға көтерілді

112 рет
көрсетілді
4 мин
оқу үшін

Өткен аптаның соңында БАӘ-нің астанасы – Әбу-Дабидегі Гранд-слэм турнирі аяқталған бетте дзюдошылардың әлемдік рейтингі қайта жаңартылды. Қазақстандық жанкүйерлер үшін ең қуанышты жайт – аса жеңіл салмақта күш сынасып жүрген Елдос Сметовтің екінші орынға көтерілуі. Бұл – бүгінгі таңда біздің балуандар арасындағы ең үздік көрсеткіш.

Елдос  екінші орынға көтерілді

Иә, Парсы шығанағында өт­кен дүбірлі додада еліміздің мақ­танышы – Е.Сметовтің жеңіс тұ­ғырына көтеріле алмағаны рас. Айтулы жарыста үш қарсы­ласын қапы қалдырған ол еке­уі­не есе жіберді. Нәтижесінде, бе­сінші орынға табан тіреді. Ал әлем чемпионатынан бөлек, Мас­терс, Гранд-слэм, Гран-при және сол секілді басқа да ма­ңызды турнирлердегі әр жеңісі үшін балуандардың ұпайы есе­лене түсетінін ескерсек, қан­дасымыздың да қоржынына біраз ұпай түсті. Қазіргі кезде 5481 ұпай еншілеген Елдос 60 кило салмақ дәрежесінде белдесіп жүрген балуандар арасында екінші орынға көтерілді. Көш бас­тап тұрған жапониялық Рюдзю На­гаямадан оның небәрі 19 ұпайы ғана кем. Егер алдағы уа­қытта өтетін лицензиялық тур­­нир­лерде Е.Сметов барынша та­бысты өнер көрсететін болса, онда қазақ дзюдошысы әлемдік рей­тингте жеке-дара көш бас­тайды.

Аса жеңіл салмақта күресетін Ғұсман Қырғызбаевтың Гранд-слэмде бас жүлдені олжалағаны бел­гілі. Осы табысының арқа­сын­да ол 500 ұпайды иеленіп, әлем­дік рейтингте бірден үш сатыға жоғарлады. Қазіргі кезде Ғұсман сегізінші орынға тұ­рақтады.

66 кило салмақтағы Ерлан Серікжанов Әбу-Дабидегі додада екі қарсыласын жеңіп, екеуінен ұтылды. Нәтижесі – жетінші орын. Соның арқасында Ерлан өзінің бұрынғы тоғызыншы ор­нында тұрақтап қалды. Мі­не, бүгінгі таңда ерлердің әлемдік рейтингінде «ТОП-10» дзюдошының қатарына осы үш жерлесіміз ғана еніп отыр.

Ал өзге мықты балуандарымыз мынадай сатыларға жай­ғасты: Ислам Бозбаев (90 кило) – 11-орын, Елдос Жұмаханов (66 кило) – 13-орын, Дидар Хам­за (81 кило) – 19-орын, Жан­сай Смағұлов (73 кило) – 26-орын. Өкі­нішке қарай, 100 және +100 ки­ло салмақ дәрежелерінде бел­де­сетін жігіттеріміздің қар­қыны тым бәсең. 

Қазіргі кезде ерлер бәсекесінде Жапония мен Грузияның қос балуаны әлемдік рейтингтің көш басында келеді. Күншы­ғыс елі өрендері арасында Рюдзю Нагаяма (60 кило) мен Джу­широ Маруямо (66 кило) ша­шасына шаң жұқтырмаса, Қап тауы қырандары қатарында Варлам Липартелиани (100 кило) мен Гурам Тушишвили (+100 кило) теңдессіз деп танылып отыр. Сондай-ақ әзербайжандық Рус­там Оруджев (73 кило), израильдік Саги Муки (81 кило) және испаниялық Николоз Ше­раза­дишвилидің (90 кило) ай­да­рынан жел есіп тұр.

Әйелдер дзюдосы жайында айтар болсақ, Қазақстан құрама командасының мүшелері арасында тек 48 кило салмақтағы Отгонцэцэг Галбадрах қана жан­күйерлердің сенім үдесінен шы­ғуда. Ол Әбу-Дабидегі додада татамиге шықпағанымен, осы­ған дейін жиған ұпай қоры­ның арқасында бүгінгі таңда сегізінші орынды иеленуде. Өз­ге қыздарымыздың нәтижесін ай­тудың өзі ыңғайсыз.

Бұрымдылар арасында Фран­ция құрамасының қарқыны өте күш­ті. Бұл елдің төрт балуаны ал­д­а­­­рына жан салмай келеді. Олар – Аман­дин Бюшар (52 кило), Кларисс Агбеньену (63 кило), Мари-Ив Гайе (70 кило) және Ма­делина Ма­лонга (78 кило). Ал өзге салмақ дә­ре­­желерінде украи­на­лық Дария Бе­лодид (48 кило), кана­да­лық Крис­та Дегучи (57 кило) және Идалис Ор­тис (+78 кило) озып тұр.