Бітімгершілеріміздің бәсі биік

Қоғам • 08 Қараша, 2019

Бітімгершілеріміздің бәсі биік

«Тамаша қызметіңіз үшін рахмет!». Осындай сөздермен БҰҰ-ның инспекциялық тобы қазақстандық жиынтық бітімгершілік ротасының базасын тексеруді аяқтады.

Жолдыбай БАЗАР

Ливандағы қазақстандықтардың бітімгершілік базасына «БҰҰ бөлімшелері дайындығын жалпы тексеру» инспекциялық тобы барды. Инспекцияның басты мақсаты – қару-жарақ пен әскери техниканы, байланыс құралдарын, оптикалық көздегішті, ротаның барлық мүліктерінің дұрыстығын тексеру, сонымен қатар санитарлық-гигиеналық норманы сақтау.

Тексерістің нәтижесі бойынша мамандар барлық үнділік батальонның ішінен екінші жиынтық бітімгершілік ротаны жақсы жағынан атап өтті.

Екінші қазақстандық бітімгершілік ротасы «Үнді батальонының құрамында қазақстандық бітімгершілік контингентін өрістету тәртібі туралы» Қазақстан мен Үндістан Үкіметі арасындағы өзара түсіністік туралы келісімге сәйкес «Ливандағы БҰҰ уақытша күштері» миссиясына қатысады. Миссияда болған кезеңде «кәсіби бітімгершілік» мәртебесін өзіне бекітті.

«Қазақстандық әскери қызметшілер өте ержүрек. Мен бұл миссияда жүргеніме бір жыл болды. Бірінші және екінші бітімгершілік ротасымен танысып, бірге қызмет еткеніме қуаныштымын. Олардың бойларында қобалжу мен қорқыныштың жоқ екені мені таңғалдырады. Бірінші ротация миссиясы барлық міндеттерге бірден кірісті. Жазғы кезеңде қандай жағдай болатынын білмесе де, оларды екінші рота алмастырды. Екінші ротаның қызметі кезінде Израиль әскері Ливанның аумағына зымыран соққысын жасағаны және Ливанның барлық аумағын басып алған демонстранттардың жаппай наразылық актілері болғаны бәріне белгілі», – деп атап өтті Индонезия өкілі.

«Ливандағы БҰҰ уақытша күштері» әскерлер штабынан инспекциялық топты жеке алып жүрген, БҰҰ Индонезиялық әскери полициясы контингентінің командирі, полковник Сони қазақстандық бітімгерлер қызмет етіп жүрген базаның деңгейін атап өтті.

«Мұндай қауіпті сәттерде БҰҰ барлық қозғалысты шектейді, барлық патрульдер тоқтатылады. Тіпті бітімгершілік базалары да сумен де, тамақпен де, басқа да қажеттіліктермен жабдықталмайды. Мұндай жағдайда қазақстандықтар инспекциялық топты жоғары деңгейде қарсы алды. Осындай жағдайларда бәрі де осылай өткере алмайтындығын ескеру керек!», – деп атап өтті ол.