Суретті түсірген: Фархат Әміре
Биылғы жарыстың басты ерекшелігі – қатысушылар Құранды қазақша мағынасымен бірге жаттауы керек. Қатысушылар «Ясин», «Мүлік» сүрелерін және 22 сүрені жатқа айту аталымдары бойынша сынға түсті.
Сайысқа қала мешіттерінің 16 жастан асқан шәкірттері қатысты. Араларында зейнет жасындағы әжелер де болды.
Сайыстың ашылуына облыстың бас имамы Жолдас қажы Қоспақұлы қатысып, Құран жаттаудың маңызы туралы айтып, қатысушыларға сәттілік тіледі.
Бұдан кейін «Мәшһүр Жүсіп» орталық мешітінің «Әйел-қыздар» секторының меңгерушісі, ұстаз Ақерке Тұрғынбай жиналғандарға сайыс шарттарын түсіндіріп, қазылар алқасымен таныстырды.
–Алла Елшісінің хадистерінде Құран оқу адамды бүкіл болмысымен ізгілікке бет бұрғызатын айтқан. Бір хадисінде: «Егер Құран оқитын мұсылманның ішкі дүниесіне үңіліп қарасаң, оның тап-таза екенін көресің, егер де жүріс-тұрысына қарасаң, оның көркем мінез-құлықты, биязы екенін көресің» делінген, – деді Ақерке Тұрғынбай.
Қазылар алқасының құрамында мешіт ұстаздары Ақерке Тұрғынбай, Нұрилә Тілеуова, Жадыра Бердімұратова және Бижан мешітінің ұстазы Айдана Әбдімәжітқызы болды.
Сайыс қорытындысы бойынша «Ясин сүресін жаттау» аталымында бірінші орынды орталық мешіттіңң шәкірті Жамал Сәрсембаева жеңіп алды. Екінші орынды Бижан мешітінің шәкірті Алмагүл Мерканова иеленді.
Ал, «22 сүре жаттау» аталымы бойынша Диана Қазымбаева бірінші орынды, екінші орынды Алмагүл Арстамханқызы, үшінші орынды Бақытжан Тілеубаеваға берілді.
Барлық қатысушылар арнайы сертификаттармен марапатталды.
