Елордада АИТВ-мен күрес айлығы басталды

Қоғам • 08 Қараша, 2019

Елордада АИТВ-мен күрес айлығы басталды

Елордада «Қоғамдастықтардың шешуші рөлі» ұранымен Дүниежүзілік ЖИТС-ке қарсы күрес ұйымының шеңберінде айлық басталды. Ол осы жылдың 5 желтоқсанына дейін жүргізіледі. Бұл туралы Нұр-Сұлтан қаласы әкімдігінің баспасөз қызметі хабарлады.

Egemen Qazaqstan

Айлықты өткізу аясында Нұр-Сұлтанда АИТВ/ЖИТС туралы білімді арттыруға, сондай-ақ осы ауруға шалдыққан адамдарға қатысты стигма мен кемсітуді жоюға бағытталған іс-шаралар жоспарланған.

Сонымен қатар АИТВ-ға жедел тестілеу акциялары жұрт көп жиналатын сауда-ойын-сауық орталықтарында, базарларда, вокзалдарда, әуежайда, «Барыс Арена» стадионында өтеді. Сондай-ақ жастар денсаулық орталықтарының волонтерлерін тарта отырып, студенттерге арналған форумдар, дебаттар, флешмобтар, дөңгелек үстелдер, викториналар ұйымдастырылады.

Нұр-Сұлтан қаласы «ЖИТС» орталығының бас дәрігері Сәбит Әбдірайымовтың мәліметі бойынша, 2019 жылдың 9 айы ішінде Нұр-Сұлтан қаласында Қазақстан азаматтары арасында АИТВ-ның 155 оқиғасы анықталды. 15-49 жас аралығындағы жастар тобында АИТВ-ның таралуы Нұр-Сұлтан қаласында «Денсаулық» мемлекеттік бағдарламасының көрсеткіштері шегінде ұсталып отыр.

«ЖИТС инфекциясының таралуына ұлттық жауап беру үшін, халықтың негізгі топтарының және АИТВ-ға шалдыққан адамдардың алдын алу, күту және қолдау бойынша қызметтерге қол жеткізуін кеңейту жолымен, 2018 жылдан бастап, қалалық ЖИТС орталығы 2021 жылға дейін жаһандық қордың грантын алды. Грант аясында біз алдын алу қызметтерін, сондай-ақ АИТВ-мен өмір сүретін адамдарға күтім мен қолдау көрсететін 4 ҮЕҰ-мен ынтымақтасамыз», деді С. Әбдірайымов.

Оның айтуынша, жобаны іске асыру кезінде осы қызметтердің халықтың негізгі топтары арасында азаматтық сектор арқылы сұранысқа ие екендігін айғақтайтын оң нәтижелерге қол жеткізілді.

Бүгінгі таңда ЖИТС орталығында АИТВ-ға шалдыққан 1095 адам есепте тұр, оның ішінде 867 пациент антиретровирустық терапияны(АРТ) алады. Бұл мұқтаждардың 80%-ын құрайды.

«Өткен жылмен салыстырғанда АРТ-ты қамту 17%-ға немесе 247 адамға артты. ЖИТС емдеу мемлекет бюджетінің есебінен толығымен тегін жүргізіледі. Антиретровирустық терапияны қабылдайтын және белгісіз деңгейге дейін берілетін вирусы бар тұлғалар инфекцияны басқаларына жұқтыра алмайды. Бұл емдеудің жоғары тиімділігінің ең сенімді көрсеткіші және АИТВ-мен сырқаттанушылықты төмендету жолындағы жетістік болып саналады», деп атап өтті спикер.