Экономика • 14 Қараша, 2019

42 инвестициялық жоба жүзеге асырылуда

11 реткөрсетілді

Биылғы 9 айда Батыс Қазақстанда 1,8 трлн теңгені құрайтын өнеркәсіп өнімі шығарылды. Бірінші жартыжылдықта жалпы аймақтық өнім 1,4 трлн теңгеге жетті, бұл көрсеткіш былтырғыдан 145 млн теңгеге жоғары. Бұл туралы кеше Орталық коммуникациялар қызметінде өткен баспасөз мәслихатында аймақ әкімі Ғали Есқалиев айтты.

Агроөнеркәсіптік кешен – облыс экономикасының күре­тамыры. Мәселен, етті ірі қара малдың саны бойынша респуб­ликада 2-орын алады. Былтыр ірі қара саны 456 мың бас болса, биыл бұл көрсеткіш 495 мыңға жетті. Малдың басын көбейту үшін 15 мың ірі қараға арналған бордақылау алаңдарын ашу жос­парлануда. 9 айда өңірде негізгі капиталға салынған инвестициялар 36%-ға артып, 388 млрд теңгеге жетті. Оның 90%-ы жеке инвестициялар. Қазір аймақта құны 1 триллион теңгеден асатын 42 жаңа ірі инвестициялық жоба жүзеге асырылып келеді. Оның нәтижесінде 5 мыңға жуық жұмыс орны ашылады. 8 жоба шетелдік инвесторлардың қатысуымен орындалып жатыр. Биыл жалпы құны 317,7 млрд теңге болатын 500 жұмыс орнын көздейтін 10 жоба іске қосылады. Атап айтқанда, газ дайындау қондырғысы, шарлы қалпақшалар өндірісі, тұрмыстық қатты қалдықтарды сұрыптау және өңдеу, кабель өнімдерін шығару, полиэтилен құбырларын шығару сынды жаңа өндіріс ошақтары кіреді. Сол секілді трансформаторларға арналған панельдік радиаторлар өндірісі, жиһаз фабрикасымен қатар Қарашығанақ қайта өңдеу кешенінде газ өндірісіндегі шек­теулерді алып тастау мен мұнай өңдеу зауыты сияқты жобалардың құрылысы қарқын алды.

– Батыс Қазақстан облы­сының инвестициялық әлеуеті өте жоғары. Аграрлық өнер­кәсіп кешені, туризм және авто­мобильдердің транзиттік ағымын пайдалану және басқа салалар бойынша жаңа инвестициялық жобалардың пулын дайын­дап жатырмыз. Әлеуетті инвес­тор­лардың сұрақтарына жедел және тиімді жауап беретін қыз­мет көрсету жүйесін құру ісі аяқ­талып келеді, – деді облыс әкімі.

Ақжайық өңірінде «Нұрлы жер» бағдарламасына сәйкес 16 миллиард теңгеден астам қара­жатқа Орал және Ақсай қалаларында 17 көппәтерлі тұрғын үй, сондай-ақ ауыл­дық жерлерде 117 үйдің құры­лысы іске асырылуда. Жыл қоры­тындысы бойынша 6 көп­пәтерлі тұрғын үй және ауыл-аймақтардағы 49 тұрғын үйді кезекте тұрған адамдарға жалға беру жоспарланған. Бұл шамамен 1080 пәтер. Осы жылы батыс өңірінде әлеуметтік тұрғыда қорғалмаған 394 отбасы пәтер кілтіне ие болды. Олардың 243-і көп балалы отбасылар. Жеке инвестициялар есебінен биыл жалпы көлемі 386 мың шаршы метрді құрайтын тұрғын үй пайдалануға берілмек.

– Жаңа жолдардың ұзындығы – 245 шақырым. Бұған шамамен 55 млрд теңге бөлінеді. Қазір мердігерлер анықталып, кейбір аудандарда жұмыстар басталып кетті. Жол құрылысын 2021 жылдың соңына дейін аяқтау көзделген. Еліміздің транзиттік әлеуетін пайдалану мақсатында Самара облысымен шекарадағы «Сырым» өткізу бекеті кеңейтілді. Жобаның со­масы – 2,2 млрд теңге. Орал­да «Нефтебаза» ауданында ұзындығы 1 шақырым және құны 5,2 млрд теңге болатын көпір қайта жаңғыртылуда. 1972 жылы салынған «Орал» халықаралық әуежайының терминалын қайта құру басталды. Бұл жолаушылар үшін ыңғайлы жаңа терминал болады, – деді Ғ.Есқалиев.

Бұдан басқа спикер 54 мыңнан астам халқы бар 40 ауылда сумен жабдықтаудың 29 нысанының құрылысы мен қайта жаңғырту жұмыстары басталғанын жеткізді. Осы мақсатқа 4,3 миллиард теңге бөлініпті. Биыл ауыз су шамамен 35 мың адам тұратын 26 ауылға келеді деп күтілуде. Нәтижесінде халықты орталықтандырылған сумен қамтамасыз ету деңгейі 86,6%-ға дейін артады.

Ғ.Есқалиевтің айтуынша, өңірде денсаулық сақтау саласын­да негізгі көрсеткіштер бойынша оң үрдіс байқалуда. Бұл жал­пы өлімнің 5,4%-ға және сәби өлімінің 19,9%-ға төмендеге­нін көр­сетеді. Нәресте өлімін азайту үшін медициналық ұйымдар 17 мамандандырылған ультрады­быстық аппараттармен жабдық­талды және 38 маман туа біткен кемістікті ерте анықтау бойынша біліктілігін арттырған, деді аймақ әкімі.

 

Соңғы жаңалықтар

Жаңғырған Жамбыл өңірі

Аймақтар • Бүгін, 06:58

Баға QR кодтар арқылы беріледі

Медицина • Бүгін, 06:53

Рухани рәуіштегі тарту

Аймақтар • Бүгін, 06:52

Тұрар тағдырының тағылымы мол

Руханият • Бүгін, 06:32

Орынбор және қазақ зиялылары

Руханият • Бүгін, 06:30

Ел ертеңі – жалынды жастар

Президент • Бүгін, 06:16

Ауыр атлеттер Катарға аттанады

Ауыр атлетика • Кеше

Көпбалалыларға көмек

Аймақтар • Кеше

Ұқсас жаңалықтар