Жобалық кеңсе жемқорлыққа қарсы қоғамдық сананы қалыптастырып, кабинеттік жүйеден open space, яғни ашық кеңсе форматына көшудің тиімді тетігі ретінде қарастырылып отыр. Бұл мемлекеттік қызметшілердің жаңа буынын жасақтауда үлкен қадам деді Экология, геология және табиғи ресурстар министрі Мағзұм Мырзағалиев. Осы арқылы жауапты орган халықты қажетті ақпаратпен қамтып, ашық пікір алмасуды көздейді. Сонымен қатар әлеуметтік маңызы бар жобаларды жүзеге асыру жолдарын жылдам әрі сапалы пысықтауға мүмкіндік береді.
– Жоба қоғаммен ашық диалог құруға, мемлекеттік қызметте жемқорлықтың алдын алатын заманауи стандарттарды енгізуге, сол секілді ықтимал тәуекелдерді анықтап, жоюға септігін тигізуге тиіс. Азаматтармен ақпараттық байланыс министрліктің ресми сайтында және кеңінен танымал әлеуметтік желілерде іске асырылады. Осы арқылы жемқорлықпен күресті тиімді жүргізіп, халықтың министрліктің жұмысына тікелей ықпал етуіне жағдай жасалмақ. Осы ретте министрлік қандай да бір туындаған мәселелер бойынша жедел әрекет етуге дайын болады, – деді М.Мырзағалиев.
Аталған жобаны жүзеге асыруға Сыбайлас жемқорлыққа қарсы іс-қимыл агенттігі де қолғабыс еткен.
– Бұл кеңседе сыбайлас жемқорлықтың тәуекелдерін алдын алудың тетіктері пысықталып, өзара іс-қимыл жолдарын қарастырамыз. Сол сияқты осы жерде халық ұсыныстарын білдіре алады. Осында талқыланатын әр мәселе бойынша сараптама жасалады. Ең бастысы, орындалған жұмыстар ашық әрі баршаға мәлім болуы тиіс. Сонда ғана кез келген тәуекелді төмендетуге болады, – деді «Адалдық алаңы» жобалық кеңсесінің жетекшісі Айгүл Соловьева.
«Адалдық алаңының» сараптамалық кеңесіне үкіметтік емес ұйымдар мен бизнес қауымдастықтардың өкілдері кіреді. Бұл сыбайлас жемқорлыққа қарсы іс-қимылды тиімді ұйымдастыруда, мемлекеттік органдар мен ұйымдар тарапынан көрсетілетін әкімшілік кедергілерді жоюға, сондай-ақ бизнесті заңсыз тексеруден қорғауға және олардың мүдделерін қорғауға тың серпін береді деген үмітте жоба авторлары.
