Ілияс ізі: «Еңбекші қазақтан» «Егемен Қазақстанға» дейін...
Басылымның басқарма төрағасы Дархан Қыдырәлінің қатысуымен І.Жансүгіровтің музейінде ақын рухына тағзым жасалып, әдеби-сазды кеш ұйымдастырылды. Облыстық мәдениет басқармасының қолдауымен өткен кеште жыр құлагерінің өлеңдері оқылып, Ілиястың журналистика саласындағы еңбектеріне шолу жасалды.
– Бұл ғасырлық мерейтойды ұлт тарихында орны бар ұлы тұлғалармен байланыстыра отырып, тағзым, тағылым сипатында өткізіп келеміз әрі бұл – аңтаңдаққа толы шежіре. Біз 100 жылдық қарсаңында басылымның өткен тарихын түгендеу үстінде «Egemen Qazaqstannyń» қазақ баспасөзінде репрессия дауылына ұшыраған газет екеніне нақты көз жеткіздік, – деді ақын музейіндегі кеште сөз алған газет басшысы.
Расында, бас басылымды басқарған 18 қайраткердің он бесі сол кезеңде атылып, өзгесі қуғын-сүргінге ұшыраған. Сондықтан газеттің 100 жылдық жылнамасы қазақ тарихынан тыс емес. Ал Ілияс Жансүгіровтің есімі «Egemen Qazaqstan» тамыр алатын «Еңбекші қазақ» газетімен тығыз байланысты. Ақын Мәскеудегі журналистика институтын аяқтағаннан кейін «Еңбекші қазақ» газетінде 3 жыл қызмет жасаған. Басылымның мерейтойын Жетісу жерінде атап өтуді Ілияс мұраларымен сабақтастырудың бір себебі осында жатыр.
Талдықорғандағы жас ақын-жазушылар мен зиялы қауым өкілдері қатысқан кеште облыстық мәдениет басқармасының басшысы Мәрлен Көлбаев, Қазақстан халқы Ассамблеясы облыстық хатшылығының меңгерушісі Ғабит Тұрсынбай, Текелі қаласының әкімі Бахтияр Өнербаев, І.Жансүгіров атындағы Жетісу университетінің оқытушысы Мұратбек Иманғазиновтер сөз алып, ақын шығармашылығы мен «Egemen Qazaqstan» газетінің 100 жылдық тарихына қатысты әңгіме өрбітті.
Жас толқын назарындағы бас басылым
Кезекті шара І.Жансүгіров атындағы Жетісу университетінде жалғасты. Мұнда студенттер қауымымен кездесті. Еркін әңгімелесу қалыбындағы жүздесуде жетісулық жастар «Egemen Qazaqstan» газетінің тарихы мен ұлт баспасөзіндегі орнына, редакция жұмысының ерекшелігіне қызығушылық танытып, интернет журналистика мен дәстүрлі баспасөз, қазіргі замандағы әлемдік трендтер, шетел журналистикасындағы ерекшеліктер, танымал газеттердің ішкі ахуалы жайында сауал қойды.
– Интернет технологиясы дамыған заманда жастардың дәстүрлі баспасөзге қызығушылығы төмендегенін айтып жатамыз. Алайда, біздің студенттеріміздің «Egemen Qazaqstan» газетінің тарихы мен редакцияның жұмысына қызығушылығы зор. Журналистика мамандығын таңдаған жастардың ертең шебер жазатын кәсіби журналиске айналуы үшін біліммен қатар тәжірибе мектебі де қажет. Осы мақсатқа жету үшін білімгерлердің қазақ баспасөзінің қарашаңырағы – «Egemen Qazaqstan» газетіне қызығушылығы заңды. Жүзжылдық тарихы бар басылыммен кездесу өткізуді студенттер өтінгелі біраз уақыт болған еді, сол мерейлі сәт мерейтойы қарсаңында орындалды. Біз алдағы кезеңде бас басылыммен тығыз байланыста боламыз, – деген университет ректоры Марат Баймырзаев ғылыми кеңестің шешімімен «Egemen Qazaqstan» газетінің басқарма төрағасы Дархан Қыдырәліге І.Жансүгіров атындағы Жетісу университетінің Құрметті профессоры атағы берілгенін жариялап, арнайы белгі тапсырды.
Кемшілікті кейде БАҚ арқылы білеміз
Жалпы Алматы облысының даму қадамдарын «Egemen Qazaqstan» газеті үнемі жазып, көрсетіп келеді. Елдің игілігіне қызмет ету – ортақ міндет.
Шара аясында басылымның басқарма төрағасы Дархан Қыдырәліні Алматы облысының әкімі Амандық Баталов арнайы қабылдады. Жылы шырайлы кездесуде облыс басшысы өңірдің әлеуметтік-экономикалық дамуы жөнінде қысқаша әңгімеледі. Әкім аймақтағы ауыл шаруашылығы, соның ішінде қант өндірісі, жүгері өсіру, мал бордақылау жайына, әлеуметтік қорғау шараларына, туризмді өркендету ісіне тоқталды. Атқарылған істерді халыққа жеткізудегі «Egemen Qazaqstan» газетінің орны ерекше екенін де атап өтті.
– Бүгінде интернет-журналистика дамыды, блогерлер белсенді деп жатамыз, бірақ сөзі салмақты, мәселелерді байыпты, объективті бере алатын газеттердің орны қашанда бөлек. Осындай басылымдар – әрдайым біздің басты мінберіміз. Кейде аймақтардағы кемшіліктерді БАҚ арқылы біліп отырамыз. Бұл жағынан бізге сын материалдар да көмектеседі. Себебі біздің барлық жерге баруға мүмкіндігіміз бола бермейді. Сондықтан сіздердің еңбектеріңізді бағалаймыз. Биыл «Egemen Qazaqstan» басылымына 100 жыл толып отыр. Бұл – үлкен белес. Мерейтойлық шараларға Алматы облысы да белсене атсалысады. Біз өз тарапымыздан қашанда қолдау көрсетуге дайынбыз, – деді өз сөзінде Амандық Баталов.
Ардагер журналистерге – лайықты марапат
Ілияс Жансүгіровтің 125 жылдығы мен «Egemen Qazaqstan» газетінің 100 жылдық мерейтойы аясындағы шара Салтанат сарайында газет ардагерлерімен және жергілікті БАҚ өкілдерімен кездесуіне ұласты.
Жиында сөз алып, бас басылымды 100 жылдық мерейтойымен құттықтаған облыс әкімінің орынбасары Батыржан Байжұманов:
– Биыл «Egemen Qazaqstan» газетінің жарық көргеніне 100 жыл толып отыр. Елбасы Нұрсұлтан Назарбаев «Отанымыздың бас газеті» деп жоғары баға берген басылым ғасырлық межеге үлкен абыроймен жетті. Бүгінгі «Egemen Qazaqstan» – жаңа тұрпатты, жоғары деңгейдегі басылым. Еліміздің өркендеуі мен жаңғыруының нағыз жаршысы. Жетісу жерінің жетістігі мен жағымды жаңалығы 100 жылдық тарихы бар газеттің бетінен көрініс тауып отыр. «Egemen Qazaqstannyń» Алматы облысындағы меншікті тілшісі болып қызмет еткен газет ардагерлері мен журналистердің қаламынан туған мақалалар біздің барлық саладағы табысымызды байтақ елімізге паш етті. Әр жылдары газет тілшісі болған Батық Мәжитұлы, Күмісжан Байжан, Нұрбол Әлдібаев, Алмас Нүсіп сияқты қаламы жүйрік журналистердің еңбегін Жетісу оқырмандары жоғары бағалайды, – деді.
Салтанатты шарада басылым басшысы газетте әр жылдары еңбек еткен Ғайыс Егембердиев, Әли Ысқабай, Батық Мәжитұлы, Күмісжан Байжан, Нұрбол Әлдібаев сияқты ардагер журналистерге құрмет көрсетіп, «Egemen Qazaqstan» газетіне 100 жыл» мерейтойлық медалімен марапаттады.
Алматы облысы
