Полиция департаменті баспасөз қызметінің хабарлауынша, 1998 жылы Ресейдің тумасы Алматы қаласында жол апатына ұшырағаннан кейін есін жоғалтқан. Ол көп жылдар бойы оңтүстік астанада тұрып келген. Туыстары іздестіріп тапқанымен, тиісті құжаттары болмағандықтан әкете алмаған. Шамасы, 1974 жылы алынған төлқұжатын жоғалтып алса керек.
«Биыл Қызылжар өңірінде тұратын туыстары 50 жастағы әйелді көшіріп алған соң көші-қон полициясына жүгінді. Басқарма қызметкерлері алдымен әйелді азаматтығы жоқ тұлға ретінде тану үшін құжатын жинауға көмектесті. Сөйтіп ресейлік әйел азаматтығы жоқ тұлға ретінде куәлік алды. Енді ол өз отанына бара алады», делінген баспасөз орталығы хабарламасында.
Көші-қон полициясының мәліметінше, жыл басынан бері тағдырдың әртүрлі сергелдеңіне кездескен жүзден астам адамнан құжат рәсімдеу жөнінде өтініш түскен. Осының алдында ғана тәртіп сақшылары 30 жыл бойы ешбір құжатсыз жүрген адамға қол ұшын берген болатын.
