Келесі жылы Алматы марафоны ерекше күтімді қажет ететін балаларға арналған 5 мекемеге қайырымдылық көмек көрсетеді. Яғни, «Кеңес» мүгедектер қоғамдық бірлестігіне Әлеуметтік бейімдеу және еңбекпен оңалту орталығы мен балаларға арнап жабдықталған ойын алаңын құрады. Есік қаласындағы ақыл-есі кеміс балаларға арналған облыстық мектеп-интернатқа футбол алаңын, «SOS Алматы балалар ауылы» мемлекеттік емес білім беру мекемесіне жаттығу алаңын салады.
Дамуында ерекшеліктері бар балалармен жұмыс істеуге арналған «Амалия» реабилитациялық орталығына сенсорлық интеграцияға арналған жабдық сатып алады. Сондай-ақ Талғар қаласындағы «Нұр» отбасылық балалар үйіне спорт алаңын сыйлайды.
– Қорымыздың басты мақсаты – спортты барлығына қолжетімді ету. Сондықтан жыл сайын Алматы марафонынан кейін біз ерекше күтімді қажет ететін балаларға арнап спорт инфрақұрылымын саламыз. Алматы марафоны құрылғалы бері 8 жыл ішінде жарысқа қатысатын жүгірушілердің арқасында 17 қайырымдылық жобасы жүзеге асты. 2019 жылы үш қайырымдылық мақсатты орындау үшін 26 миллион теңге бөлінді. 2020 жылы балаларға арналған мекемеге 35 миллион теңге көлемінде қайырымдылық көмегін көрсету жоспарланған, – дейді «Бірінші болу – батылдық» корпоративтік қорының атқарушы директоры Салтанат Қазыбаева.
Естеріңізге сала кетейік, «Алматы марафоны-2020» 19 сәуірде өтеді. Оған әлемнің түкпір-түкпірінен 18 мыңдай әуесқой спортшы келеді деп күтілуде.