Финалға шыққан жеті боксшымыздың алтауы қарсыластарынан басым түсіп, Азия чемпионы деген атаққа ие болды. 49 килода жұдырықтасқан Мұхаммедсабыр Базарбайұлы финалда үндістандық боксшыдан айласын асырса, 56 килодағы Бейбарыс Жексен мен 64 килодағы Дархан Дүйсебай өзбекстандық боксшыларды жеңіп, алтын жүлдеге қол жеткізді.
Сондай-ақ 52 килодағы Сабырхан Махмұд тайландтық спортшыны жеңсе, 91 килодағы Тоғамбай Сағындық өзбекстандық қарсыласын ұтты. Аса ауыр салмақтағы Сабырғали Аманат Оңтүстік Корея боксшысынан өз мықтылығын дәлелдеді. Өкінішке қарай 75 килодағы Азамат Бектас финалда жеңіліп, күміс жүлдеге иелік етсе, Марғұлан Айдарұлы (69 кг), Ерасыл Жақпеков (81 кг) жартылай финалда өзбек боксшыларына жол беріп, қола жүлдені қанағат тұтты. Жалпы есепте Қазақстан командасы бірінші орын иеленді.
