Жұмыс сапары Қызылжар ауданындағы еңбек күші мол өңірлерден қоныс аударушыларға арналған тұрғын үйлерді аралаудан басталды. Бұл үйлер өнімді жұмыспен қамту және жаппай кәсіпкерлікті дамыту «Еңбек» мемлекеттік бағдарламасы аясында салынуда. Биыл облысқа 688 отбасы қоныс аударды. 2060 адамның 1031-і жұмысқа қабілетті жаста болса, 935-і – жеткіншек, 57-сі – студент, 37-сі – зейнеткер. Облыстың әлеуметтік-экономикалық дамуының кешенді жоспары негізінде 2142 үйдің құрылысы қарастырылған. 428 үй биыл салынды. Екі жатын бөлме, қонақ бөлме және ас үй, барлығы 120 шаршы метрді құрайды.
Бердібек Сапарбаев Қызылжар ауданының Бәйтерек ауылында салынған үйлерді аралап, қоныстанушылармен әңгімелесті. Үйдің жылы екенін айтқан Руслан Насыров бұл ауылға мамыр айында әйелі және екі баласымен Түркістан облысы Қазығұрт ауданынан қоныс аударып келген екен. Өз шешімінің дұрыс екендігіне көзі жеткен отағасы осы ауылда тұрақтап қалмақ.
«Бұл өңірдің топырағын алғаш досыма қонаққа келіп басқан болатынмын. Мені көшуге көндірген сол. Жұмыспен қамту орталығына барып, қандай бос жұмыс орындары бар екенін сұрадым. Ондағы мамандар барлығын түсіндірді, шарттарды құлағдар етті. Бірнеше жұмыс орнын ұсынып, таңдауға мүмкіндік жасады. Баспана мәселесі оңай шешілетінін айтты. Біз – жас отбасымыз. Қол жеткізуге тиісті жоспарымыз да көп. Бәйтерек бізге ұнады. Адамдары кеңпейілді, көмек қолын созуға қашанда дайын, – дейді Руслан Насыров.
Жаңа үйлер жылы, жарық, қолайлы. Тұрғындардың көңілінен шығып отыр.
Жұмыс тобы атбасын тіреген келесі нысан – жергілікті мектепте, Бәйтерек ауылының тұрғындарымен кездесу өтті. Тұрғындар ауылының бір орында тұрмай дамып, көркейіп келе жатқандығын айтты. Су, коммуникация мәселесінде еш қиындық жоқ. Үкімет басшысының орынбасарына тек балабақшаның жетіспейтіндігін айтып, осы мәселеге қолғабыс жасауды өтінді.
Вице-премьер Бескөл ауылында да болды. Аудан әкімдігінде жұмыс тобының халықпен кездесуі ұйымдастырылды. Еңбек және халықты әлеуметтік қорғау министрі Біржан Нұрымбетов көп балалы және аз қамтылған отбасыларды қолдаудың жаңа тәсілдері туралы егжей-тегжейлі айтып берді.
Бердібек Сапарбаев жұмыс тобының басты міндеті халықтың өмір сүру сапасын бағалау және проблемалық мәселелерді шешуге жәрдемдесу деп атап көрсетті. Әсіресе білім және денсаулық сақтау сияқты маңызды әлеуметтік салаларға ерекше тоқталды.
Петропавл
