Алғашқы голды жетінші минутта Ресей спортының мақтанышы, ҚХЛ-дың талай рекордын жаңартқан сақа ойыншы, Олимпия ойындарының жеңімпазы, әлемнің екі дүркін чемпионы және сол жарыстың төрт дүркін жүлдегері деген дардай атағы бар әйгілі Сергей Мозякин соққан еді.
Үзілістен кейін Павел Акользин таразы басын теңестірді. Одан кейін есеп өзгерген жоқ. Ал қосымша уақытта Линус Виделль нысананы дәл көздеп, қонақтарға жеңіс сыйлады. Есеп – 1:2.
Ресми дерекке сүйенсек, «Барыс» 1999 жылдың 26 қарашасында құрылған екен. Яғни, Нұр-Сұлтанның хоккейшілері өздерінің 20 жылдық мерейтойын Магнитогорск қаласындағы тамаша жеңісімен атап өтті.
