Біздің өңірдегі «Сары-Бидайық» кен орнында әктас, Шәукенде құм, «Майсор» мен «Қарасор» кен орындарында да құм жетеді. Бұдан басқа «Тыңқұдық», «Құмкөл» көмір кен орындары, Екібастұзда, Қалқаманда, Ақсуда, Май ауданының аумағында кеніштер, оның ішінде «Кемертұз» кеніші бар. Екіншіден, «Павлодар өзен порты» АҚ Ертіс өзенінің мүмкіндіктерін арттыра түсуде.
Жалпы, осы табиғи ресурстар қаншалықты тиімді пайдаланылуда? Кен орындарын өркендету бойынша қандай жобалар жүзеге асырылуда, жер қойнауын пайдаланушы өндірістердің жұмыс нәтижелері қандай деңгейде?
«Егемен Қазақстанның» Павлодар облысындағы тілшісі Фарида Бықай облыстық табиғи ресурстар және табиғат пайдалануды реттеу басқармасының басшысы Әлібек Несіпбековке:
– Сіз бұған не дейсіз?
– Жалпы, кен орындарының жұмысын жандандыру жайы біздің басқарманың тұрақты назарында. Облыстың минералды-шикізат қорын игеруді дамыту бойынша 2013-2015 жылдарға арналған іс-шаралар жоспары бекітілді. Бүгінде өңірдегі 35 пайдалы қазбалар кен орнының 17-сі игерілуде. Олардың 12-сінде түсті кен шығарылса, қалғандарында көмір өндіріледі. Сонымен қатар, кең тараған пайдалы қазбалардың 105 нысаны тіркелген. Өткен жылы кен орындарын игеруге салынған инвестиция көлемі – 183,6 млрд. теңгені құрады. Мысалы, «Павлодар» әлеуметтік-кәсіпкерлік корпорациясы» АҚ жер қойнауындағы байлықты іске жарату бойынша 19 жобаны жүзеге асыруда. Бұл игілікке барлығы 17 млрд. теңге инвестиция құйылмақ. Құрылыс индустриясы дамып, өнім алыс-жақын шетелдерге экспортталмақ. Көршілес Омбы облысының біздің өңірдің кірпішіне деген сұранысы артып отыр. Осы бағытта «Қарасор кен байыту комбинаты» компаниясының негізінде жылына 20-30 млн. кірпіш шығаратын зауыт іске қосылады. Жергілікті кәсіпорындар кірпіш экспорттау бойынша ресейлік компаниялармен келісімшарттар жасасуда.
Ал алдағы үш жылда негізгі күш қатты пайдалы қазбалар кен орындарын игеруге бағытталады. Ол бойынша «Сары-Бидайық» кен орнында әктас, Шәукен ауылында құм игеру, «Майсор» мен «Қарасор» кен орындарында кварц құмын өндіру қолға алынады. Облыс аумағындағы «Тыңқұдық», «Құмкөл» көмір кен орындарында барлау жұмыстары жүргізіледі. Екібастұзда, Қалқаманда кірпіш шығаратын өндіріс орындары ашылады.Сонымен қатар, Ақсу қаласы мен Май ауданының аумағында орналасқан «Кемертұз» кенішінен отқа төзімді материалдар шикізаты өндірілетін болады. Ертіс өзені арқылы ауыр жүк тасу тасымалдаудың өзге түрлеріне қарағанда арзан әрі тиімді. Қиыршық тасты ірі көлемде Ресейге өткізу өңір экономикасына, жергілікті өндіріс орындарына пайда әкеледі.
Павлодар облысы.
