Қарадаланың қызанағы Ресейге экспортталады

Аймақтар • 02 Желтоқсан, 2019

Қарадаланың қызанағы Ресейге экспортталады

46 рет көрсетілді

Жетісу өлкесіндегі жылыжай өндірісі жақсы жолға қойылған өңірдің бірі – Ұйғыр ауданы. Бүгінде ауданда заманға сай технологиямен жабдықталған 5 жылыжай жұмыс істеп тұр. Жалпы аумағы 10,4 гектар аумақты алып жатқан өндірісте өткен 6 ай ішінде 1200 тоннадан астам өнім жиналған.

Қалмаханбет МҰҚАМЕТҚАЛИ

Қарадалада өскен көкөніс өніміне сұраныс жоғары екен. Қазір жылыжайдан жиналған қызанақтың 500 тоннасы Ресейге жөнелтіліпті. Көрші елдің нарығына жасалған қадам сәтті болып, алдағы күндері тапсырыс көлемі арта түседі деген сенім бар. Өйткені, қызанақ өнімі жылыжайда өскенімен, табиғи нәрден ажырамаған, яғни, жасанды қоспа сіңбеген. Нарықта қазір осындай табиғи өнімге қызығушылық жоғары.

Айтпақшы, Қарадала төсінде бау-бақша көлемі жыл сайын жайқалып өсіп, көбеюде. Бүгінде ауданда 623 гектар бақ бар. Оның ішінде 513 гектарға абрикос ағашы, 40 гектарға алма ағашы отырғызылған екен. Жалпы, жеміс-жидек бақтарының көлемі 4532 гектарға жетсе, 1860 гектарынан өнім алынды. Сондай-ақ ауданда алманың «Апорт» сортын өсіру жолға қойылыпты, қазір 380 гектарды құрайтын бақта тек осы жеміс түрі өседі. Жүзім бағының көлемі 635 гектарға жеткен. Күтіп, баптау ісінің бәрі жаңа технологияда жүреді. Оның ішінде 473 гектар бақта тамшылатып суару әдісі қолданылады.

- Ауданымыз ауыл шаруашылығына иек сүйегенімен, қайта өңдеу өндірісін де дамытып отырмыз. Қазір елде 15 өнеркәсіп өнімдерін өндейтін кәсіпорын бар. Өткен 9 айда 1 млрд 585 млн теңгелік өнім өндіріліп, былтырғы жылдың сәйкес кезеңімен салыстырғандағы табыс көлемі 100,2 процентті құрады. Ал шағын және орта кәсіп бағытында 7639 адам кәсіпкерлікпен айналысып, есепті мерзімде 5 млрд 702 млн 214 мың теңгелік тауар өнімін өндірді. Яғни, аудан бюджетіне 402 млн 576 мың теңге осы шағын кәсіптен түсті, - дейді Ұйғыр ауданының әкімі Шухрат Нұрахунов.

Жалпы Ұйғыр ауданында биылғы жыл қорытындысы бойынша әлеуметтік-экономикалық дамудың барлық бағыттары бойынша оң өсім байқалды. Атап айтқанда, аграрлық секторда ғана өткен 9 айда аралығында жалпы құны 18 млрд теңгеден астам өнімі өндіріліпті.