Жоба Дариға Назарбаеваның бастамасымен құрылып, «Дегдар» гуманитарлық қорының ұйымдастыруымен биыл екінші рет өтуде. Фестиваль аясында ауылдық елді мекендерде орналасқан төрт балалар үйіне қаржы жинап, қайырымдылық көмек көрсетіледі. Кеше «Қазақстан» орталық концерт залында Ақмола облысындағы Ақкөл ауданының Урюпин ауылы балалар үйінің тәрбиеленушілеріне арнап «Open space» іс-шарасын өткізді.
Ұйымдастырушылар балалардың өз сұрауына қарай жаңажылдық сыйлықтар да әзірлеген. Сыйлықты балаларға өз қолымен табыстаған Сенат Төрағасы Дариға Назарбаева: «Бүгін сіздермен кездесіп, бақытты жүздеріңізді көргеніме қуаныштымын. Үйірмелерге қатысқан балалардың қаншалықты талантты, білімге және заманауи ғылымдарға қаншалықты құштар екендігін көрдік. Сіздерге болашағы жарқын, мақсаты айқын тұлға ретінде өсіп, барлық асқақ армандарыңыздың орындалуын тілеймін. Айналаңызда өмірін балалардың қамқорлығына арнап, күнделікті бақыт шуағын сыйлап жүрген көптеген жақсы, мейірімді адамдар бар. Балалардың қасынан табылатын тәрбиешілер мен педагогтарға зор алғыс білдіремін», деді.
Сондай-ақ балалар «Ерекше актерлер театрының» қойылымын, кескіндеме өнері, қыш өнері және заманауи билер бойынша шеберлік сыныптарын тамашалап, роботтехника үйірмелерін, виртуалды және химия лабораторияларын көрді, аниматорлармен бірге қызықты ойындарға қатысты.
«Мелодии волшебства» қайырымдылық фестивалінің аясында біз бүгін екінші рет балалар үйінің тәрбиеленушілерімен кездесіп отырмыз. Бұл ата-анасының қамқорлығынсыз қалған балалардың арасында мүмкіндігі шектеулі өспірімдер де бар. Былтыр фестиваль аясында 52 942 250 теңге қаражат жиналып, 209 бала қамтылған болатын. Жиналған қаражат есебінен ауылды жерде орналасқан 4 балалар үйіне көмек көрсетілді. Ал биыл 315 бүлдіршінге көмек көрсетілмек. Бұған қоса, тағы 4 балалар үйін сапалы әрі қажетті құрал-жабдықтармен қамту жоспарланған», дейді «Дегдар» гуманитарлық қорының директоры Лаура Ахметова.
Атап айтқанда, биыл Урюпинка ауылындағы «балабақша – мектеп – интернат» арнайы кешені, Шығыс Қазақстан облысының білім басқармасына қарасты «№8 балалар үйі» КММ, Қарағанды облысы Осакаровка ауданындағы «Жетім балалар мен ата-ана қамқорлығынсыз қалған балаларға арналған мектеп-интернат» КММ және Қостанай облыстық денсаулық сақтау басқармасының «Орталық нерв жүйесі органикалық зақымданған және психикасы бұзылған балаларға арналған Рудный мамандандырылған сәбилер үйі» КММ-ге көмек көрсетілмек.
Қайырымдылық фестивалі 7 желтоқсанда «Қазақстан» ОКЗ-да Дариға Назарбаева, Медет Чотабаев, Мейір Байнеш, Альфия Каримова, Азат Мәлік, Азамат Жылтыркөзов, «FORTE TRIO» мемлекеттік триосы, «Астана Опера» театрының хоры мен симфониялық оркестрі, дирижер Абзал Мұхитдинов сияқты танымал өнер иелерінің қатысуымен оперетталар мен мюзиклдердің ариялары орындалатын концертпен аяқталады. Сондай-ақ «Астана Опера» театры спектакльдерінің костюмдерінен құрылған көрме ұйымдастырылады.
