«Рухани жаңғыру» бағдарламасын жүзеге асыру мақсатында Ш.Уәлиханов атындағы Тарих және этнология институтында «Ұлы даланың ұлы есімдері: жастарды патриоттық тәрбиелеудің ғылыми-теориялық және зерттеу мәтініндегі практикалық қырлары» тақырыбында өткен жас тарихшы-ғалымдардың VІІ халықаралық ғылыми-тәжірибелік конференциясы барысында осындай түйткілді мәселелер талқыланды.
Қазіргі заманғы тарих ғылымының өзекті мәселелерін талқылау, оның ішінде ғылыми-зерттеулердің тұлғатану бағытын дамыту, «Ұлы даланың ұлы есімдері» жобасы бойынша жүзеге асқан жобалардың нәтижелерін көпшілікке тарату, өскелең ұрпаққа патриоттық және адамгершілік тәрбие беруді мақсат етіп отырған іс-шарада Жас ғалымдар кеңесінің төрағасы, PhD Тимур Әпендиев Тұңғыш Президенті – Елбасы Н.Ә.Назарбаев «Болашаққа бағдар: рухани жаңғыру» бағдарламалық мақаласында Қазақстанды әлемнің дамыған отыз елінің қатарына енуді мақсат етіп қойғандығын негізге ала отырып, «Бағдарлама іске асуы үшін алдымызда қандай міндеттер тұр? Қандай өзгерістер қажет?» деген сауалдарға көпшіліктің назарын аудара келе «Қоғамның саяси және экономикалық дамуы, алдымен, қоғамдық сананың жаңғыруымен тікелей байланысты дейтін болсақ, әрбір халықтың жүріп өткен жолы, бүгінгі дамуы, болашағы, дәстүрі мен мәдениеті, ұлттық коды маңызды рөл атқарады. Демек, біздің, яғни тарих саласында зерттеулер жүргізіп жүрген жас ғалымдардың алдында үлкен жауапкершілік тұр. Біздің зерттеулеріміздің ғылыми сапасы, тарихи фактілерді, құбылыстарды түсіндіріп, ұғындырудағы ұстанымы, сондай-ақ белгілі бір тарихи жағдайларда тұжырымдарды дұрыс қолдана білуін басшылыққа алуымыз қажет» деп атап өтті.
Жас ғалымдар конференция материалдарын Қазақстанның, шетелдердің кітапханаларына, ЖОО, ғылыми-зерттеу институттарына таратумен қатар ТМД елдері жас ғалымдарының жазғы мектептерін өткізу дәстүрін жалғастыру, сонымен қатар келесі жылы наурыз айында «Tugurul Han On-Han» корпоративтік қорымен бірлесе отырып, Тұғырыл хан, Тайбұға хан және Сейдақ хан атындағы жас тарихшы-ғалымдарға арналған республикалық байқауын өткізу сияқты жас ғалымдарды ынталандырып, ғылымға тартуға байланысты кешенді жоспарларды талқылады.
Конференция барысында аталған институттың ғылыми қызметкері М.Морякова жас ғалымдар тарапынан атқарылған жұмыстарға шолу жасап, жобалардың таныстырылымын өткізсе, С.Велент-Щербач, С.Зиеев, Э.Темиров, М.Буваков, М.Жылгелдинов, О.Алымқожаев, М.Қозыбаева, Қ.Өмірбек, М.Шағырбаев, Ж.Қуаныш, Д.Жайлыбаев, Ұ.Төлешова секілді Беларусь, Өзбекстан, Тәжікстан, Қырғызстан елдерінен келген және отандық ғалымдар ғылымның өзекті мәселелерін талқылап, өз зерттеулері бойынша баяндама жасады. Сондай-ақ ұсынылған және талқыланған баяндамалар негізінде конференция қатысушылары қазіргі тарихи тұлғатанудың өзекті мәселелеріне орай шешімдерін ортаға салды.
Іс-шара аясында жас ғалымдар арасындағы жыл сайын өткізілетін Ермұхан Бекмаханов атындағы республикалық байқау қорытындысы жарияланып, жеңімпаздар марапатталды.
АЛМАТЫ
