Алматы қаласы әкімдігінің қолдауымен «Рухани жаңғыру» бағдарламасы аясында ұйымдастырылған айтулы додада балалар мен жасөспірімдер және ересектер мен ардагерлердің қалай өнер көрсеткені жайында біз бұған дейін де толық ақпарат берген едік. Турнирдің соңғы күні ADCC нұсқасы бойынша кәсіпқойлар арасында бәсекелер өтті.
Жарыс жолына шыққан 80 спортшы алты жүлде жиынтығын сарапқа салды. Кәсіпқойлар арасындағы «жан алысып, жан беріскен» айқастардың қорытындысы бойынша есімдері төменде аталған спортшылар жеңіс тұғырына көтерілді:
65,9 кило: 1. Сұлтан Әлібаев (Қазақстан), 2. Нариман Мыңбаев (Қазақстан), 3. Бауыржан Әлімбаев (Қазақстан).
76,9 кило: 1. Ералы Балдыбеков (Қазақстан), 2. Нартай Қажеков (Қазақстан), 3. Мағжан Маратхан (Қазақстан).
87,9 кило: 1. Данияр Әубәкіров (Қазақстан), 2. Темірлан Алпысов (Қазақстан), 3. Илнар Сарқұлов (Қазақстан).
98,9 кило: 1. Рамазан Құсайынов (Қазақстан), 2. Бексұлтан Өмірзақов (Қырғызстан), 3. Евгений Хан (Ресей).
+99 кило: 1. Шахмарал Жетпісов (Қазақстан), 2. Арман Жанпейісов (Қазақстан), 3. Шыңғыс Тұрсынханов (Қазақстан).
Абсолютті салмақ: 1. Шахмарал Жетпісов (Қазақстан), 2. Темірлан Алпысов (Қазақстан), 3. Бекзат Баймұратов (Қазақстан).
Жарыс қорытындысы бойынша 6 алтын, 5 күміс және 5 қола медальді иеленген Қазақстан құрамасы жалпы командалық есепте бас жүлдені олжалады. Сондай-ақ, Қырғызстан мен Ресей спортшыларына бір-бір жүлдеден бұйырды. Жеңіс тұғырына көтерілген саңлақтарды джиу-джитсу мен грэпплингтің хас шебері, осы турнирді тамашалау үшін сонау Австралиядан арнайы келген даңқты спортшы Крэйг Джонстың өзі марапаттады.
Бірер жылдан бері «Qazagstan Top Team» командасын жаттықтырып жүрген АҚШ маманы Адам Фокс «Arlan Grip Championship» турнирінің аса бұл жолы да жоғары деңгейде өткенін айта келе, ұйымдастырушыларға зор алғысын білдірді.
