![Ұлттық спорт үздіктері анықталды](/media/2019/12/10/crop-2_156_319x635_img12.jpg)
Мәжілістің маңызы жайлы түсіндірген Ұлттық спорт түрлері қауымдастығының президенті Бекболат Тілеухан барлық мәдени-спорттық шаралар Елбасы Н.Ә.Назарбаевтың «Болашаққа бағдар: рухани жаңғыру» және «Ұлы даланың жеті қыры» атты мақалаларында айтылған бағдарламалық идеяларды іске асыру мақсатында жасалып жатқанын атап өтті.
Одан кейін аталған қауымдастықтың атқарушы директоры Нұрсұлтан Ибрагимов алқалы жиынға қатысушыларға биыл атқарылған жұмыстар жайлы есеп берді. Оның айтуынша, көкпардан 2 халықаралық, 4 республикалық жарыс, 2 республикалық турнир; аударыспақтан 1 халықаралық, 5 республикалық жарыс, 2 республикалық турнир; теңге ілуден 1 халықаралық, 4 республикалық жарыс, 1 республикалық турнир; жамбы атудан 6 халықаралық, 4 республикалық жарыс, 1 республикалық турнир; бәйге түрлерінен 1 республикалық жарыс, 2 республикалық турнир; құсбегіліктен 1 халықаралық, 3 республикалық жарыс, 1 республикалық турнир өткізіліпті. Яғни, спортшыларымыз осы жылы 13 халықаралық, 22 республикалық жарыс пен 9 республикалық турнирге қатысыпты.
Сонымен қатар биылғы 19-22 сәуір аралығында Алматы қаласында Дүниежүзілік этноспорт конфедерациясының ІІ халықаралық құрылтайы өтіп, оған әлемнің 40-тан астам елінен 150-ге жуық өкіл келіп қатысса, 30 мамыр мен 2 маусым аралығында Нұр-Сұлтан қаласы әкімдігімен бірлесіп ұйымдастырған «Nur-Sultan Ethno Fest» мерекесі елорда тұрғындары тарапынан кең көлемде қолдау тапқан екен.
Сол сияқты биыл жалпы жүлде қоры 54 миллион теңгені құрайтын Атырау облысы Махамбет ауданы Талдыкөл ауылында өткен «Дарабоз-2019» халықаралық турнирі; Алматы облысы Райымбек ауданында ұйымдастырылған «Сонар-2019» халықаралық құсбегілер турнирі; Ақмола облысы Бурабай өңірінде құсбегі Мәсіп Батырханұлы атындағы бүркітшілердің халықаралық жарысы қатарлы шаралар ұлттық спорттың ажарын ашса, алдағы 2020 жылғы ақпан айында аударыспақтан «Қазақстан Қабыланы» атты жоба жалауын көтермек көрінеді.
Келесі кезекте сөз алған Мәдениет және спорт министрлігі Спорт және денешынықтыру істері комитеті Ұлттық спорт түрлері басқармасының басшысы Қарлығаш Рамазанова келтірген ресми мәліметтен түйгеніміз, ұлттық спорт түрімен 2017 жылы 343 мың адам шұғылданса, өткен жылы бұл көрсеткіш 376 мың адамды құраған. Қазіргі таңда еліміз көлемінде ұлттық спорт түрлерінен 8 мамандандырылған спорт клубы және 13 мамандандырылған спорт мектебі жұмыс істеп тұр. Өткен жылдың қорытындысы бойынша республикалық деңгейде 86 іс-шара, оның ішінде 50 республикалық, 36 халықаралық жарыс өткен.
– Қазіргі таңда күн тәртібінде тұрған басты мәселе 2021 жылы елімізде өтуі тиіс Бүкіләлемдік этноспорт ойындары, – деді Қарлығаш Әсетқызы. Бұл бағытта министрлік пен қауымдастық және ұлттық спорт түрлері федерациялары бірлесе жұмыс жасауымыз қажет. Ұйымдастыру комитеті құрылып, оның тұрақты отырыстарында ойындарды ұйымдастыру мен өткізу мәселелері талқылануы тиіс.
Алқалы жиын барысы түстен кейін үздіктерге арнайы берілетін «Алтын тұғыр-2019» марапатына ұласты. Осымен жетінші мәрте ұйымдастырылып отырған сыйлықтың «Үздік мергендер» санаты бойынша – Айкөз Ералхан мен Бабажан Бақдәулет, «Үздік бәйге аттары» – «Қоянқасқа», «Үшқоңыр», «Қызжирен», «Үздік аударыспақшылар» – Аманжол Нұрбек, Құралбай Ермек, Нармағанбет Иманғазыұлы, Ағабек Ғабит, «Қазақ күресінің үздік балуаны» – Нариман Тұтқышев, «Үздік тоғызқұмалақшы» – Ғалымжан Темірбаев, «Үздік бүркітші» – Серікболсын Жалғасұлы, «Үздік теңге ілуші» – Ғалымжан Ізжанов, «Үздік көкпар командасы» – жастар құрамасы, «Үздік көкпаршы» – Құрманбек Тұрғанбек, «Үздік төреші» – Ерлан Жүсіпов, «Үздік жаттықтырушы» – Арслан Қабжанов, «Үздік ұлттық спорт клубы» – «Әулие ата» спорт клубы, «Жаппай көкпар үздіктері» болып Ғалымжан Мырзабаев пен Жомарт Зиябек танылды.
Сондай-ақ ұлттық спортқа еңбек сіңірген тұлғаларға берілетін «Елімжан» медалі Алматы облысының әкімі Амандық Баталов пен Ұлттық Олимпиада комитетінің бас хатшысы Сәкен Мұсайбековке табыс етілді.