Дөңгелек үстелге Мемлекеттік хатшы Қырымбек Көшербаев, Сенат және Мәжіліс депутаттары, дипломатиялық корпус басшылары, дипломатиялық өкілдіктердің өкілдері, Үкімет мүшелері және БАҚ өкілдері қатысты.
Қырымбек Көшербаев өз сөзінде Қазақстанда адам құқықтарын қорғау мәселесінің халықаралық міндеттемелері тұрғысынан өзектілігін, сондай-ақ құқық қорғау механизмдерін жетілдіру саласында мемлекеттің азаматтық қоғам институттарымен өзара сындарлы диалогын дамытудың маңыздылығын атап өтті.
Дөңгелек үстел барысында Конституциямен және қолданыстағы заңнамамен қамтамасыз етілген адамның және азаматтың құқықтары мен бостандықтарының іске асуы жөнінде айтылды. Сондай-ақ халықаралық стандарттарға сәйкес адам құқықтарын қорғау мен қамтамасыз етудің ұлттық тетіктерін одан әрі жетілдіру жайында кең пікір алмасу болды.
Қатысушылар халықаралық құқықтың нормаларын ұлттық заңнамаға енгізу мәселелерін алға тартып, адам құқықтарын қорғаудың халықаралық және ұлттық тетiктерiн жетілдіруге қатысты пайымды пікір білдірді. Сонымен қатар адам құқықтарын сот және соттан тыс институттар арқылы қорғауды жетілдірудің өзекті мәселелері де назарға алынды.
Талқылауға қатысқан халықаралық және ұлттық сарапшылар Қазақстандағы құқық қорғау тетіктеріне оң баға берді.
Дөңгелек үстелге қатысушылар адам құқықтары саласында Қазақстан ратификациялаған халықаралық шарттардың құқық қорғау тетіктерін жетілдірудегі және адам құқығын қорғаудың ұлттық жүйесін нығайтудағы маңызды рөлін атап өтті.
– Еліміздің барлық жетістіктері мен жемістері Тұңғыш Президент – Елбасы Нұрсұлтан Назарбаевтың мемлекеттік қайраткерлігінің, Қазақстан халқынының жасампаздық еңбегінің арқасында мүмкін болды. Қазақстанның өркендеуін Мемлекет басшысы Қасым-Жомарт Тоқаев сабақтастық, әділдік, даму жолымен жалғастыруда. Президент жанындағы Адам құқықтары жөніндегі комиссиясы үкіметтік емес ұйымдармен, халықаралық ұйымдармен тең әріптестік орнатқан сындарлы әрі тиімді диалог алаңына айналды, – деді Қазақстан Президенті жанындағы Адам құқықтары жөніндегі комиссияның төрағасы Қуаныш Сұлтанов.
