Қоғам • 13 Желтоқсан, 2019

Партия қандастарға қолдау көрсетеді

Nur Otan партиясы, Дүниежүзі қазақтарының қауымдастығы және «Отандастар» қоры өзара түсіністік меморандумына қол қойды. Үшжақты меморандумға қол қоюдағы басты мақсат – дүниежүзіндегі қазақтарды тарихи отаны төңірегіне ұйыстыру ісіне қолдау көрсету, атажұрттан тыс жерде, басқа елде туып өсіп, елге оралған қандастарымызға көмек қолын созу.

Жолдыбай БАЗАР

Елбасы, Nur Otan партиясының Төрағасы Нұрсұлтан Назарбаев Дүниежүзі қазақтарының кезекті құрылтайларының бірінде: «Шетелдегі қазақтардың елге жиі келіп, туған жерімен байланыстарын нығайтып отырғаны дұрыс. Қай елде тұрсаңыздар да, әрдайым Қазақстанды жүректеріңіздің төрінде ұстаңыздар. Қазақтың тарихи Отаны біреу-ақ. Ол – Қазақстан», деген еді.

Осы орайда, Nur Otan партиясы Төрағасының бірінші орынбасары Бауыржан Байбек шет елдердегі және Қазақстанға келген этностық қазақтарды қолдауға бағытталған еліміздің стратегиялық жоспарларын жүзеге асыру жұмыстарына атсалысуға партияның әрқашан әзір екенін жеткізді. Сондай-ақ ол еліміз тәуелсіздік алғалы бері Елбасының бастамасымен тарихи Отанына 1 миллионнан астам қазақ қайтып оралғанын, соның арқасында ұлтымыздың демографиялық жағдайы қандастарымыздың үлесі есебінен жақсарғаны туралы айтты.

Ал «Отандастар» қорының президенті Нұртай Әбіқаев қор құрылған күннен бастап осы күнге дейін атқарылған жұмыстарға жан-жақты тоқталып, бірлескен меморандумның маңыздылығын атап көрсетсе, Дүниежүзі қазақтарының қауымдастығы Төрағасының бірінші орынбасары Зауытбек Тұрысбеков алдағы уақытта үшжақты меморандумның негізінде жастармен, медиа және басқа да салаларда бірлескен жұмыстар атқарылатынын сөз етті.

Айта кетейік, 1989 жылғы мәлімет бойынша, еліміздегі қазақтардың саны 6,5 миллион адам болса, яғни жалпы Қазақстандағы халық санының 39%-ын құраса, қазір бұл көрсеткіш 70%-ға жетті. Қазақ тілінің қолдану аясы бұрынғымен салыстырғанда айтарлықтай кеңейді.

Күннің маңызды және өзекті жаңалықтарын «Егемен Қазақстан» телеграм каналынан оқыңыз