Сол уақыттан бері Жамбыл облысы тарихтың тағдырлы кезеңдерінде де өзінің болмысын сақтап қалды. Ал еліміз тәуелсіздік алған жылдардан бергі кезеңде Жамбыл облысы өзінің жаңа тарихи даму жолына түсті. Мемлекет басшысы Қасым-Жомарт Тоқаев биылғы жылы Жамбыл облысына жұмыс сапарымен келгенде, өңірдің даму барысына оң бағасын берген болатын. Бұл – өңір үшін жоғары баға.
Еліміз егемендік алған жылдардан бастап мемлекеттің қолдауымен өңірде өндіріс дамып, ауыл шаруашылығы саласы алға басты. Тәуелсіздіктің 28 жылында Жамбыл облысында 871 әлеуметтік нысан бой көтерген. Оның ішінде 245 білім, 126 денсаулық сақтау, 500-ге тарта спорт нысандары ел игілігіне берілді. Соңғы 15 жылда облыс бюджетінің 12 есеге артуы да мемлекеттің қолдауының нәтижесінде болып отыр. Бүгінде Жамбыл облысының әкімі Асқар Мырзахметовтің бастамасымен өңірде көптеген ілкімді істер қолға алынуда. Әсіресе жергілікті тұрғындардың әлеуметтік жағдайын көтеру басты назарда. Бұл ретте облыста жүзеге асып жатқан «Қарапайым заттар экономикасын» қарышты дамыту бағытындағы қанатқақты жобасы Үкімет үйінен қолдау тапты. Облыстың он ауданынан бір-бір ауылдан таңдалып алынып, ел тұрмысын тіктеу бағытында жұмыстар жүргізілуде. Сонымен қатар жыл басынан бері 430 мың шаршы метр тұрғын үй пайдалануға берілді. Сондай-ақ көп балалы отбасыларға 142 пәтер сатып алуға республикалық бюджеттен 1 миллиард 191,0 миллион теңге қаржы қарастырылып, қазіргі таңда мемлекеттік сатып алу жұмыстары жүргізілуде. Биыл көп балалы отбасылар үшін Тараз қаласында 8 жатақхана салынуда. Жыл соңына дейін 6 жатақхана пайдалануға берілсе, қалған 2 жатақхана келесі жылы беріледі. Бұдан бөлек, Тараз қаласының сәулеттік келбетін арттыру, аудандар мен ауылдарды көркейту, сол жердегі халықтың талап-тілегін қанағаттандыру мақсатында да көптеген жүйелі жұмыс атқарылуда. Тараз қаласының орталығынан салынып жатқан «Шахристан» кешенінің өзі көне Тараздың заманауи келбетін жасаған айшықты өнер деуге болады. Биыл – Жамбыл облысының 80 жылдығы. Айтулы күнге орай, облыс әкімі Асқар Мырзахметовтің бастамасымен өңір бойынша 80 нысанды ашу жоспарланып отыр. Сонымен қатар Әулиеата өңірінің тарихынан сыр шертетін тұлғалар шығармашылығын қамтыған 80 томдық кітап жарық көрді.
Ел ерсіз болмайды. Қазақтың руханияты мен өнеріне өлшеусіз үлес қосқан, мемлекеттің дамуына айрықша еңбек сіңірген тұлғалар да Жамбыл облысынан көптеп шықты. Қазақтың көрнекті жазушысы, Мемлекеттік сыйлықтың лауреаты Әкім Тарази Жамбыл облысының 80 жылдығына орай, өзінің туған жерге деген ыстық ықыласын жеткізді. «Туған жерім, Жамбыл өңірі менің тағдырымда айрықша орын алады. Әрбір жетістігіне қуанып отырамын. Өзім де Жамбылға жиі барып тұрамын. Туған жер, өскен ел бәрінен қымбат», дейді жазушы. «Жамбыл облысы 80-ге толып отыр. Бұл үлкен мерейтой. Біздің елде еңбекқор, қарапайым халық тұрады. Мен Әулиеатаны, сол жердегі халықты жақсы көремін. Құшағыма сыйса, бәрін де құшақтағым келеді», дейді Қазақстанның халық әртісі Тұңғышбай әл-Тарази.
Бүгінде Жамбыл өңірі өрлеу кезеңінде. Қазіргі кезде аймақта атқарылып жатқан нәтижелі жұмыстар соның айғағы. Күн сайын Тараз шаһарының сәулеті артып, аудандар мен ауылдардың бәсі биіктеп келеді.
Жамбыл облысы
