Жүзден жүйрік жеңімпаздар

Қорытынды шараға Мемлекеттік хатшы Қырымбек Көшербаев, Премьер-Министрдің орынбасары Бердібек Сапарбаев, Ақпарат және қоғамдық даму министрі Дәурен Абаев және БАҚ өкілдері қатысты.

Үш кезеңді қамтыған жобаның алғашқы кезеңінде «Қазақстанның 100 жаңа есімі» қатарына енуге ниет білдірген қазақстандық 1673 азаматтың анкетасы қабылданды. Келесі ке­зе­ң шарты бойынша 5-25 қараша ара­лығында жобаның 100janaesim.ruh.kz ресми сайтында жалпыхалықтық дауыс беру жүр­гізілді. Онда отандас­тарымыз тарапынан бар­лығы 700 мыңнан астам дауыс жиналыпты.

Ал 28 қарашада құрамына Қазақ­станның халық әртісі Роза Рымбаева, «Технодом» компания­сының негізін қалаушы Эдуард Ким, «Kaspi.kz» АҚ директорлар кеңесінің төрағасы Вячеслав Ким, Олимпиада чемпиондары Александр Винокуров пен Серік Сәпиев, «BTS» білім бағытындағы компанияның жетекшісі Саясат Нұрбек, қоғам қайраткері Мұрат Әбенов, «Талап» қолданбалы зерт­теу орталығының жетекшісі Рахым Ошақбаев, «Қазақстанның Азаматтық Альянсы» заңды тұлғалар бірлестігінің президенті Асылбек Қожахметов, кәсіпкер, жазушы Қуаныш Шонбай, музыкант, Димаш Құдайбергеннің продюсері Қанат Айтбаев енген қазылар алқасының отырысы өтті. Нәтижесінде, жүзден жүйрік танылған 32 жеңімпаздың есімі жаңғырды. Оның 25-і онлайн дауыс беруде ең көп дауыс жинағандар болса, 7-еуін қазылар құрамы ұсы­ныпты.

Олардың қатарында мәдениет саласында Алматы облысынан Әлібек Нұрбек, Нұр-Сұлтан қаласынан Қанат Нұртазин мен Дина Байтасова, Павлодар облысынан Иманбек Зейкенов, Шығыс Қазақстан облысынан Ольга Чавкина; қоғам саласында Алматы қаласынан Әсел Баймұқанова, Нұр-Сұлтан қаласынан Шынар Болсамбекова, Асхат Садуов, Нұргүл Олжекова, Әсел Жанасова, Эльнара Байназарова, Шымкент қаласынан Алдияр Жұмаханов, Түркістан облысынан Айжан Жүзбай, Шығыс Қазақстан облысынан Қуандық Қанатов пен Ержан Омарханов, Алматы облысынан Елдар Сапаров; ғылым және білім саласында Ақмола облысынан Назгүл Жакенова, Қостанай облысынан Максим Рюмин, Жамбыл облысынан Шәкәрім Сейсенбай, Алматы қаласынан Дана Шаяхмет; медицина саласында Қызылорда облысынан Сәулет Қалдашов, Алматы қаласынан Бауыржан Рақышев; спорт саласында Қостанай облысынан Рүстем Ерғали, Қарағанды облысынан Абылайхан Жүсіпов, Иван Снегуров, Қостанай облысынан Малика Мұхтарова, Маңғыстау облысынан Ильдар Ягьяев; бизнес саласында Батыс Қазақстан облысынан Әсел Аяпова, Алматы облысынан Әйгерім Берекешева, Алматы қаласынан Рүстем Ермекбай, Азат Сембинов, Қостанай облысынан Динара Шукижанова бар.

– Еліміздегі ең жас мектеп директорымын. Мектеп ұжымында 213 азамат қызмет етіп, 2 700 оқушы білім алады. Ұстаздық қызметтегі мақсатым – мемлекетіміздің білім саласын брендке айналдырып, әлем­дік бәсекедегі мәртебесін одан әрі арттыру. Қазіргі таңда өкінішке қарай, беделді жоғары оқу орындарын тәмамдаған  білімді азаматтардың арасында мектепке барып, ұстаз болып білім беру – үрдіске айналмаған. Ал біздің негізгі байлығымыз – жер астындағы алтын емес, мұнай емес, халқымыздың ұшан-теңіз білімі. Сол себептен бізге мықты ұстаздар қажет. Себебі ханның да, қараның да өмірлік ұстаздары болған, – деді жоба жеңімпазы, Нұр-Сұлтан қаласындағы №54 мектеп-лицейінің директоры Шәкәрім Сейсенбай.