Облыстық энергетика және тұрғын үй шаруашылығы басқармасының басшысы Сайын Кәменовтің айтуынша, бұл күндері облыстағы қалалар мен аудандардың қысқы маусымға дайындығы бекітілген кестеге сәйкес жүргізілуде. Жылу энергетика және тұрғын үй-коммуналдық шаруашылық нысандарын алдағы күз-қыс маусымына дайындыққа сай өңірдегі электр стансалары күрделі жөндеулерден өтіпті. Яғни, электрмен қамту желілерінің 2462,8 шақырымына және 745 қосалқы стансаға, 29 қазандыққа, жылумен қамту желілерінің 25,4 шақырымына, сумен қамту желілерінің 62,1 шақырымына күрделі жөндеулер жүргізіліп, 2399 тұрғын үйде қысқа дайындық жұмыстары жалғасуда. Қазіргі күндері мектептердің – 77, денсаулық сақтау нысандарының – 86, әлеуметтік, мәдениет және тұрмыстық нысандардың 71 пайызы дайын.
Сонымен қатар, облыс әкімі Ерлан Арын облыстағы барлық мектептер 1 қыркүйекке дейін жылу беру маусымына дайын болсын деген арнайы тапсырма берді. Бәрінен бұрын өкініштісі сол, кейбір тұрғындар жылу мен жарықтың қайдан келіп, қайдан шығып жатқанын білмей тегін дүниедей көретінін коммуналдық қызметтерге төленбеген қарыздар тізімінен көреміз. Осы жылдың 1 маусымындағы жағдай бойынша облыс тұрғындарының қарызы 457,9 миллион теңгені құрап отыр. Тұтынушылар жылумен қамтуға 331,9 миллион теңге, электрмен қамтуға 90,0 миллион теңге, сумен қамту қызметтеріне 36,0 миллион теңге төлемеген. Бұдан бұрындары да қалалар мен аудандардың әкімдеріне мерзімінен кешіктірілген қарыздарды жабу және оны болдырмау бойынша тиісті іс-шаралар әзірлеу жөнінде тапсырмалар берілген-ді. Біз бұл жайында «Қарыз бен парыз» атты мақаламызда жазып кеткенбіз. Сөйткен қарыз әлі күнге дейін жиналған үстіне жиналып, көбейіп барады.
Ерлан Арын қалалар мен аудандардың әкімдеріне, мемлекеттік органдар басшыларына қарыз мәселесін бақылауға алып, 1 қыркүйекке дейін көрсетілген коммуналдық қызметтер қарызын жабу бойынша қатаң шаралар жүргізуді, сондай-ақ, шалғайдағы және қала іргесіндегі ауылдардың электр, су, жылумен қамту нысандарын назарға алуды тапсырды. Айтпақшы, ауылдар демекші, облыс орталығына қарасты Теміржолшылар кенті қазір құрылыс алаңына айналған, өз ағайындарымыз ауылдардан келіп, тұрғын үйлерді көптеп салып жатыр. Бірақ, электр жарығының жоқтығы үлкен мәселеге айналып отыр. Өткен жылы бағаналар орнатылыпты. Кентке электр жарығын тартумен жұмыс жасап жатқан «Кабистройсервис» ЖШС мердігер ұйымы осы жылдың соңына дейін жарық жағып береміз деп уәде беріпті. Тұрғындардың айтуынша, қазір жарқыраған жаз айында сымдарын тартып, электр жарығын жақпаса, былтырғыдай тағы да қараңғы үйде қалар түрлері бар. Біреулер жарықты сутегін пайдаланса, ауыл тұрғындары жарыққа зәру...
Фарида БЫҚАЙ,
«Егемен Қазақстан».
Павлодар облысы.
