Расында, өрт түтіні бүгінде Жаңа Зеландияға жеткен. Лондон халқы да ауаның ластануына шағым түсіріп жатыр. Белгілі саясаткерлер қолдау көрсететінін хабарлап, танымал актерлер мен әншілер әлем жұртшылығының назарын аудару үшін кампаниялар ұйымдастыруда.
Алғашқылардың бірі болып Малайзия көмекке әзір екенін білдірді. Мемлекет вице-премьері Ван Азиза Ван Исмаил Аустралияның шығысы мен оңтүстік-шығысындағы өртті сөндіруге құтқарушылар мен арнайы техника жіберуге дайын екенін хабарлады.
Көп ұзамай Франция президенті Эммануэль Макрон да тілсіз жаумен бірігіп күресуге ниетті екенін жеткізді. «Елді күлге айналдырған өртпен күресіп жатқан Аустралия халқына көңіл білдіремін. Бүгін Скотт Моррисонға (Аустралияның премьер-министрі) хабарласып, көмекке әзір екенімізді, халықтың қауіпсіздігін қамтамасыз етуге, қоршаған ортаны апаттан сақтауға даяр екенімізді айттым», деді ол.
Қолдаушылар қатарынан АҚШ, Жаңа Зеландия, Сингапур мен Канада да табылды. Аустралия премьер-министрі Скотт Моррисон мемлекеттер мен үкіметтер басшыларына ризашылығын білдірді.
Ұлыбритания патшайымының отбасы да тілеулестігін жеткізді. «Біздің ойымыз да, жүрегіміз де сендермен бірге. Бейбіт күнде қауышуды тілейміз», деп хат жолдаған. Бұл тілекке премьер-министр Борис Джонсон да қосылып, Британия үкіметінің көмекке әзір екенін хабарлады. Папуа- жаңа Гвинеяның үкімет басшысы Джеймс Марапе 1000 жауынгер мен өрт сөндірушінің шақырту күтіп отырғанын мәлімдеді.
Қол ұшын созамын деушілердің ішінде Вануату Республикасы да бар. Тынық мұхитындағы аралдың тұрғындары жапа шеккендерді қолдауға 250 мың Аустралия долларын аударған. Вануату премьер-министрі Джотам Напат «Көршілерімізді қолдауға әзірміз. Аустралия бізге қашанда көмек беретін, біз де олардың қайғысына ортақпыз, қолымыздан келгенше көмек көрсетеміз», дейді.
Фиджи Республикасының үкімет басшысы Франк Байнимарама да отандастарының жылы лебізін жеткізді.
Аустралиялық кәсіпкерлер зардап шеккендер қорына жаппай қомақты қаржы аударып жатыр. Аустралияның әйгілі сатиригі Селеста Барбер «Өртке қарсы күрес» қорын ашқан. Небәрі 48 сағатта қор қоржынына 13 млн АҚШ доллары түскен. Оған жер-жерден 1,1 млн адам ақша аударған екен. Көмек қолын созған танымал тұлғалар арасында теннисшілер Марина Шарапова мен Новак Джокович бар. Ал аустралиялық теннис жұлдызы Ник Кирьос қаңтарда қатысқан әр додасынан түсетін сыйақының қомақты бөлігін қайырымдылыққа жұмсайтынын айтты. Қолдаушылар тізімінде Голливуд жұлдыздары да бар.
Өрт көп отбасыны үйінен айырғаны белгілі. Осыған орай әлемнің түкпір-түкпірінде азық-түлік, ойыншық, киім мен тұрмысқа қажетті заттарды жинау науқаны жүріп жатыр. Отқа оранған Жаңа Оңтүстік Уэльс штатының басшысы азық-түліктің жетіспеуінен екінші апаттың тууы мүмкін екенін ескерткен. Виктория штатында да жағдай мүшкіл. Олар қаржылай көмекке зәру екенін жасырмады. Халықтың «Бізге әзірге тамақ пен киім емес, ақша қажет» деген өтінішін Полиция және қауіпсіздік қызметтері министрі Лиза Невиль жеткізді.
Аустралия экономикасын көтеру үшін #GoWithEmptyEskies науқаны басталған. Белсенділер Аустралияда қонақүй жалдау, азық-түлік сатып алу арқылы экономиканы көтеруге үлес қосуға шақыруда. Аустралияда тегін көмек көрсету үшін мыңдаған адам әлемнің басқа бұрышынан жолға шыққан. Оқиға орнында еріктілер көп. Олардың барлығы тегін қызмет етіп жүр. Бұған дейін хабарлағанымыздай, Аустралия үкіметі де табиғи апатта зардап шеккендердің отбасыларына 4200 АҚШ доллары көлемінде өтемақы төлемек. Тілсіз жаумен күресуге мемлекет тарапынан 16,2 млн АҚШ доллары бөлінген.
