Парламент Сенатының депутаттары Мұрат Бақтиярұлы, Бекмырза Еламанов және Дана Нұржігітова жұмыс бабындағы сапар аясында Қызылорда облысындағы Арал ауданында, Қаратерең, Қосшар, Қаратерек және Бөген ауылдарында болды.
Депутаттар ауыл тұрғындарымен, шаруа қожалықтары мен жауапкершілігі шектеулі серіктестіктер ұжымдарымен, мұғалімдермен, медицина қызметкерлерімен, аудандық мәслихат депутаттарымен және ауыл белсенділерімен кездесу өткізді. Сонымен қатар «Көкарал» су бөгетін аралап, жұмыстарымен танысты.
Сенаторлар тұрғындарға «Көкарал» су бөгетін жөндеу-қалпына келтіру және жаңғырту жұмыстары бойынша ағымдағы жылы жобалау-сметалық құжаттар әзірлеуге қосымша қаржы қаралып жатқанын жеткізді.
Кездесу барысында сондай-ақ таяуда Сенатта қабылданған «Педагог мәртебесі туралы» Заңның еліміздегі педагогтердің құқықтарын кеңейтуді, ауыртпалықты азайтуды, мұғалім мамандығына қойылатын талаптарды күшейтуді, мұғалімдерді материалдық тұрғыда ынталандыруды, жастарды педагог мамандығына тартуды көздейтін ережелер жан-жақты талқыланды.
* * *
Алматы облысының Іле ауданында Мәжіліс депутаттары Омархан Өксікбаев, Әбдіманап Бектұрғанов, Амангелді Дәуренбаев Nur Otan партиясының аудандық филиалында азаматтарды қабылдау өткізді.
Кездесуге қатысушылар депутаттарға өздерін толғандырып жүрген мәселелерін айтып, ақыл-кеңес алды. Қойылған сауалдардың көбі әлеуметтік сала, жұмыспен қамту және ауылды абаттандыру мәселелеріне қатысты болды.
Мәселен, Қапиза Нұранова депутаттарға Жетіген ауылындағы Жаңаталап көшесінің жолын жөндеуге ықпал етуін сұрады. Өтініш берушілердің барлық өтініштері мен ұсыныстарын тыңдаған депутаттар, уәкілетті органдармен бірлесіп, қолданыстағы заңнама аясында бұл мәселелерді шешуге көмек көрсетілетіндігін жеткізді.
Кездесу барысында О.Өксікбаев Nur Otan партиясының депутаттары өз сайлаушыларымен үнемі байланыста болып, ауыл тұрғындарының проблемаларына барынша көңіл бөлетінін атап өтті.
Халықтың тыныс-тіршілігінен хабардар болған депутаттың айтуынша, бүгінгі қабылдау аудан тұрғындарының билікпен диалогқа және жалпы мәселелерді бірлесіп шешуге дайын екендігін көрсетті.
* * *
Мәжілістің Әлеуметтік-мәдени даму комитетінің төрайымы Гүлшара Әбдіқалықова мен депутат Михаил Чирков елордадағы «Жастар» театрының ұжымымен кездесті.
Мәжіліс депутаттары, Nur Otan партиясы фракциясының мүшелері Қазақстан Республикасы Президентінің негізгі бағдарламалық құжаттары мен бастамаларын іске асыру үшін қабылданған заңнамалық жаңашылдықтар, сондай-ақ Мәжілістің заңнамалық жұмыстары туралы хабардар етті.
Әңгіме барысында мәдениет саласындағы өзгерістерге ерекше назар аударылды. Г.Әбдіқалықованың айтуынша, Мемлекет басшысы Қасым-Жомарт Тоқаевтың Жолдауы аясында мәдениет қызметкерлеріне қолдау көрсетудің нақты шараларын қарастыратын «Мәдениет туралы» заңға түзетулер әзірлеу тапсырылды. Бұған мәдени қолдау қорын құру, цифрландыру мәселелері және концерттік қызметті реттеу кіреді. Сондай-ақ, осы жылдың бюджетінде театр қызметкерлерінің жалақысын көтеруге қаражат қарастырылған.
Өз кезегінде театр әртістері «Мемлекеттік сатып алу туралы» заңға тиісті өзгертулер енгізуді көздейтін декорация мен сахналық костюмдерді сатып алумен байланысты проблемалар туралы айтты.
* * *
Мәжіліс депутаттары, Nur Otan партиясы фракциясының мүшелері Айзада Құрманова, Айгүл Нұркина және Александр Суслов Павлодар облысы Тереңкөл ауданының Песчаное ауылының тұрғындарымен кездесті.
Депутаттармен кездесуге еңбек ардагерлері, мұғалімдер, медицина қызметкерлері, жастар, кәсіпкерлер, шаруа фермер қожалықтарының басшылары, Песчан механикалық-жөндеу зауытының өкілдері қатысты.
Әңгіме барысында Мәжіліс депутаты Айзада Құрманова депутаттар мен сайлаушылар арасындағы тікелей байланыс аймақтардан объективті ақпарат алу және оны әрі қарай заңнамалық жұмыстарда пайдалану үшін қажет екенін атап өтті.
Депутаттар ауыл тұрғындарын елімізде жүргізіліп жатқан реформалар туралы хабардар етті. Атап айтқанда, 2020 жылдың 1 қаңтарынан бастап міндетті медициналық сақтандыруды енгізу, көп балалы отбасылар үшін жаңа форматтағы мемлекеттік жәрдемақылар, жаңа АӘК тағайындау ережесі және басқа мәселелер қозғалды. Сондай-ақ жергілікті өзін-өзі басқару бюджетін қалыптастыру және іске асыру мәселелері талқыланды.
Ауыл тұрғындары су тазарту құрылысын қайта құру мәселесіне алаңдаушылық білдіріп, халық қалаулыларынан осы мәселені шешуге көмек көрсетуді сұрады.
– Елбасының тапсырмасы бойынша жүзеге асырылатын «Ауыл – ел бесігі» бағдарламасын жүзеге асыруға үлкен үміт артамыз, – деп атап өтті депутат Айзада Құрманова. – Нақты қадамдар қабылдануда, миллиардтаған бюджет қаражаты ауылдық жерлерде өмір сүру сапасын арттыруға, ауылдық елді мекендердің әлеуметтік және инженерлік инфрақұрылымын дамытуға бағытталған, – деді депутат.
