Назарбаев Зияткерлік мектептер желісінде дәстүрлі түрде өткізілетін пәндік олимпиадаға еліміз бойынша 800-ге жуық оқушы қатысып, білімдерін ортаға салды. Нұр-Сұлтан қаласына жиналғандар Қазақстан тарихы, құқық негіздері, математика және физика пәндерінен сайысқа түссе, қазақ, орыс, ағылшын, неміс, француз тілдерінің білгірлері Шымкенттегі физика-математика бағытындағы Зияткерлік мектепте өзара бақ сынасты. Ал Алматыдағы химия-биология бағытындағы Назарбаев Зияткерлік мектебінде олимпиада қатысушылары информатика, химия, биология, география пәндері бойынша білім таластырды.
Нағыз білімді анықталар байқауда қызылордалық өрендер жүлделі жеті орынға ие болды. Атап айтқанда, 11-сынып оқушысы Айым Сексенбаева және 10-сынып оқушысы Әйгерім Тұрмаханова қазақ тілі мен әдебиеті пәнінен үшінші және екінші орындарды алды. Ал 11-сынып оқушысы Гүлшат Қалбаева мен мектеп бітіруші Саодат Құрманаева орыс тілі пәнінен күміс медальға қол жеткізді. 10-сыныптағы Жангерей Зейнелов пен 11-сыныптан Әділ Дастан олимпиадада Қазақстан тарихы пәні бойынша сайысқа түсіп, екінші және үшінші орындарды иеленді. Сонымен қатар география пәнінен де оқушылар үздік нәтиже көрсетіп, 11-сынып оқушысы Әлішер Алтынбасов қола медальмен марапатталды.
