Депутаттармен кездесуге орталыққа қаланың әр ауданынан жиналған 40 шақты көп балалы ана арнайы келіп қатысты. Кездесу барысында көп балалы аналардың мұң-мұқтажы тыңдалды. Аналар әртүрлі тақырыптарды көтерді. Көптеген сұрақ атаулы әлеуметтік көмек алуға қатысты болды, оған Мәжілістің вице-спикері Гүлмира Исимбаева егжей-тегжейлі түсініктеме берді.
Сонымен қатар көп балалы аналар тұрғын үй, тұрғылықты жері бойынша тіркелу, ипотекалық несие және т.б. сұрақтарға жауап алды. Орталық жетекшісі Зульфия Байсақова мәжілісмендерге орталықтың көп балалы және тұрмысы төмен отбасыларды әлеуметтік қолдауы бойынша мәлімет берді.
Орталықта мамандар аналарға жаңа мамандықтарды игеру бойынша курстар өткізіп, психологиялық және құқықтық кеңес берілетінін айтты. Сондай-ақ кездесуге Nur Otan партиясы Алматы қалалық филиалы төрағасының бірінші орынбасары Станислав Канкуров, Nur Otan партиясы Медеу аудандық филиалының төрағасы, аудан әкімі Сұлтанбек Мәкежанов, Алматы қаласы Әл-ауқат басқармасының басшысы Рахат Шимашева қатысты.
