Өзара тең дәрежелі әріптестік

БАҚ өкілдеріменмен кездесу барысында Д.Эспозито ГРЕКО-ға кірудің артықшылықтары, оның жұ­мыс қағидаттары, сыбайлас жемқорлыққа қарсы күрес саласындағы Еуропа кеңесінің конвенциялары мен мониторинг ерекшеліктері тұрғысында сөз өрбітті.

– Географиялық тұрғыда ГРЕКО Еуропа елдерін қамтиды. Сондай-ақ Сыбайлас жемқорлыққа қарсы мемлекеттер тобының мүшелігіне мұхиттың арғы бетіндегі АҚШ қабылданды. Енді міне оның құрамына Қазақстан да кіріп отыр. ГРЕКО – мониторниг жүргізетін халықаралық ірі 4 бастаманың бірі саналады. Бұл бастама құрамындағы мемлекеттермен тең дәрежеде қарым-қатынас жасайды. Сондықтан Қазақстан да бұл бастаманың тең дәрежелі мүшесі деп айта аламын, – деді Д.Эспозито.

Сыбайлас жемқорлыққа қарсы мемлекеттер тобының  атқарушы хатшысы Қазақстанның коммуникациялық, цифрлы инфрақұрылымының дамуы­на қатысты таңданысын жасырмады. Оның айтуынша, бұл жетістіктер сыбайлас жемқорлықпен бұдан арғы күресте аса маңызды. Себебі цифр­ландыру – сыбайлас жемқорлықтың жолын кесетін бірден-бір құрал саналады.

Д.Эспозито мемлекеттік органдармен, министр­ліктер­мен, құқық қорғау органдарының өкілдерімен өзара іс-қимыл да аса маңызды екенін алға тартты. Себебі бір ғана агенттік сыбайлас жемқорлыққа қарыс күрес саясатын толық жүзеге асыра алмайды. Бұл күрестің әрбір мемлекеттік органға қатысы бар.   

Айта кетейік, өткен жылы 30 жел­тоқ­санда елі­­міз тиісті заң жобасын рати­фикациялап, Қазақстан ресми түрде Еуропа Кеңесінің Сыбайлас жем­қорлыққа қарсы мемлекеттер тобының (ГРЕКО) 50-ші мүшесі болып кірген еді. Ал күні кеше ГРЕКО-ның атқарушы хатшысы Джанлука Эспо­зито Қазақстанға ресми сапармен келді.

Сапар барысында Д.Эспозито сыбайлас жемқор­лыққа қарсы іс-қимылда Қазақстанның ақпараттық технология­ларды пайдалану тәжіри­бе­сін таразылау мақсатында Нұр-Сұлтан қаласындағы Сыбайлас жем­қорлыққа қарсы іс-қимыл орта­лы­ғы­ның, Жоғары соттың ахуалдық орталығы мен iKomek орталығының жұ­мысымен танысты. Еліміздің тех­но­логиялық дамуына жоғары баға берді.

Қазақстанның ГРЕКО-ға кіруі аясында бірқатар кездесулер де өтті. Мәселен, ГРЕКО-ның атқарушы хат­шысы өз сапары аясында Мем­ле­кет басшысы Қасым-Жомарт Тоқаев­тың қабылдауына болды. Сондай-ақ Сыбайлас жемқорлыққа қарсы іс-қимыл агенттігінің төрағасы Алик Шпекбаев, құқық қор­ғау ор­ган­да­ры­ның өкілдері және Д.Эспозито қа­тысқан сыбайлас жемқорлыққа қарсы іс-қимылдың халық­аралық тәжірибесі талқыланды.