Еске сала кетейік, бұған дейін Мемлекет басшысының тапсырмасымен 2019 жылғы қарашадан бастап Нұр-Сұлтан, Алматы, Шымкент, Ақтау, Қарағанды, Өскемен, Павлодар, Көкшетау, Тараз, Петропавл, Семей әуежайларында «Ашық аспан» режімі енгізілді. Бүгін Парламент отырысында Дания Еспаева ендігіде бұл тізімге Ақтөбе қаласының әуежайын да қосу жайында ұсыныс айтты.
- «Ашық аспан» режімі - шетелдік әуе компанияларына облыстардағы ірі қалаларға рейс жасауға мүмкіндік береді. Ақтөбе қаласының халықаралық әуежайы еліміздің батыс жақтауының қақпасы және ірі өнеркәсіптік орталық болғандықтан бұл шешімнің маңызы зор, - деді Дания Еспаева.
Оның айтуынша, бұл Қазақстанның транзиттік әлеуетін күшейтіп, ішкі әуежайлар арқылы тасымалды арттыруға зор үлесін тигізеді.
- Қазақстанда бұл режімнің енгізілуі жаңа шетелдік тасымалдаушыларды тартуға, жаңа халықаралық бағыттардың ашылуына, сондай-ақ туризмнің дамуы мен Ақтөбе қаласының халықаралық қаржы орталығының көлікке қол жетімділігінің артуына ықпал етеді, - деді депутат.
