Жалынды жауынгерлердің көзіндей болған символикалық мәні терең жәдігер 11 мың шақырымды артқа тастап, еліміздің барлық қалаларын шарлайтын болады. Айтулы рәсімнің Алматыдан бастау алғаны тегін емес. Өйткені алғаш рет 1941 жылы генерал-майор Панфилов басқарған 316-атқыштар дивизиясы Алматыда жасақталған болатын.
Ел басына алапат қасірет әкелген қан майданда ерен ерлік көрсеткен Панфиловшылар дивизиясы сарыла күткен Ұлы Жеңістің орнауына ауқымды үлес қосты. Құрамындағы 28 сарбазы түгелдей Кеңес Одағының батыры атанған әрі еліміздегі тұңғыш гвардия атағы берілген даңқты дивизия сарбаздарының жүріп өткен жолы Жеңіс тарихының айнасына айналғанын жақсы білеміз. Еске алу қозғалысының кестесі бойынша Эстафета жолын жалғау үшін Ұлттық ұланның 37 әскери бөлімінен Ту ұстаушылар тобы жасақталған. Тұтас ел аумағында салтанат құратын эстафета барысында соғыс және еңбек ардагерлерімен 68 кездесу өткізу жоспарланыпты.
– Қазақта «Өткендерін еске алу өскендіктің белгісі» дейтін сөз бар. Аға ұрпақтың майданда төккен қызыл қаны мен аналарымыздың тылдағы қап-қара терімен келген Ұлы Жеңіс күнін біз ешқашан ұмытуға тиіс емеспіз. Жеңіс әрбір әулеттің тарихымен астасып жатыр. Келер ұрпаққа өсиет етіп айтатын ұлы күн. Заман өзгереді, әр дәуірдің өзіндік үні болады. Бірақ өткен тарих ешқашан өзгермейді. Өйткені бұл халықтың басып өткен жолы. Сондықтан біз бұл күнді жыл сайын аталарымызды еске алумен өткіземіз. Панфиловшылардың ардақты, қасиетті туы Қазақстанның қаншама аймағын аралайды. Бұл жас ұрпақтың санасына сәуле түсіріп, жүрегін дір еткізбеуі мүмкін емес, – дейді Бауыржан Момышұлының келіні, жазушы Зейнеп Ахметова.
Расында, біз Ұлы Жеңіс деп атайтын қасиетті күннің тасасында талай жанның кермек тағдыры жатыр. Өткен күнге үңілсек, елімізде бірде-бір өрені қан майданға аттанбаған әулет жоқ. Айтулы шара аясында Панфилов дивизиясының көзі тірі жауынгері Қайырлы Жоңқабаевтың үйінің ауласында салтанатты шеру ұйымдастырылды. Ардагерді ҚР Ұлттық ұланы Бас қолбасшысының орынбасары генерал-майор Мұхаметқали Сатов бастаған ұландықтар Жеңіс мерекесімен құттықтады.
Қайырлы Уатайұлы 1921 жылы 10 қыркүйекте Шығыс Қазақстан облысы, Самар ауданында дүниеге келген. Еңбек жолын 1940 жылы ШҚО Құлжа орта мектебінде мұғалім болып бастаған ол, соғыс басталған жылы Панфилов дивизиясының 23-ші гвардиялық полкіне Қызыл Әскер жауынгері ретінде қабылданған. Ардагер соғысқа бастан аяқ қатысып, майдан даласында Кеңес Одағының батыры Мәлік Ғабдуллинмен бір сапта шайқасыпты. 1943 жылы ақпанда Ржевтегі қанды қақтығыста ауыр жараланған жауынгер жеңісті Дрезденде қарсы алыпты.
«Бейбітшілік пен берекенің қадірін біліңдер. Одан асқан бақыт жоқ. Үлкенге құрмет, кішіге ізет көрсету қанымыздан келе жатқан қасиет. Ең бастысы осы қасиетті жоғалтып алмаңдар. Тәуелсіздігіміз мәңгілік, ел іргесі берік болсын. Келешек ұрпағымның алдынан енді ешқандай кедергі кездеспесін. Тек қана мамыражай бейбіт заман болып, соғыс өрті тұтанбасын. Адамды адам қылатын, адамгершілік пен адал еңбек қана», – дейді көпті көрген соғыс ардагері Қайырлы Жоңқабаев.
