Парламент депутаттарының ел өңірлеріне сапары аясында Сенат депутаты Әділ Ахметов пен Мәжіліс депутаты Қуаныш Сұлтанов Қызылорда облысында болып, Шиелі, Жалағаш, және Сырдария аудандарын аралады.
Парламент депутаттарының ел өңірлеріне сапары аясында Сенат депутаты Әділ Ахметов пен Мәжіліс депутаты Қуаныш Сұлтанов Қызылорда облысында болып, Шиелі, Жалағаш, және Сырдария аудандарын аралады.
Депутаттар «Қазатомпром» ұлттық компаниясының уран және күкірт өндіру кәсіпорындарының жұмысымен, «Батыс Қытай – Батыс Еуропа» автокөлік дәлізінің құрылысымен танысты. Сондай-ақ, депутаттар облыс әкімдігінде өткен күріш шаруашылығының келелі мәселелері сөз болған кеңейтілген жиынға қатысты.
Қызылорда өңірі тұрғындарымен кездесе отырып, Ә.Ахметов пен Қ.Сұлтанов әлеуметтік қамсыздандыру, тұрғын үй құрылысы, мәдениет салаларын дамытудың толғақты мәселелерін талқылады.
– Жалпы, облыста индустриялық-инновациялық даму, орта және шағын кәсіпкерлікті қолдау, тұрғындарды әлеуметтік қорғау бойынша көп жұмыстар атқарылуда. Әсіресе, инфрақұрылымды жаңғырту, қалалар мен ауылдарды көркейтудегі тың әрекеттерді атап өту қажет, – деді сенатор Ә.Ахметов.
ҚЫЗЫЛОРДА.
***
Парламент Сенатының депутаты Жабал Ерғалиев Төтенше жағдайлар министрлігі Көкшетау техникалық институтының курсанттарымен кездесті.
Сенатор институттың басшылығы мен жеке құрамына еліміздегі қандай да болсын игілікті істерге белсене атсалысатын жігерлі ұмтылыстары үшін ризашылығын білдіре келіп, бірінші курсқа қабылданған курсанттарға табыс тіледі. Сондай-ақ ол курсанттардың құтқарушы сияқты мәртебелі мамандықты таңдау арқылы өздерінің өмірлік жолын таңдағанын атап өтті.
Мемлекет басшысы Нұрсұлтан Назарбаев Қазақстан халқына Жолдауында «Бәсекеге қабілетті дамыған мемлекет болу үшін біз сауаттылығы жоғары елге айналуымыз керек», деп ұлт алдына биік мақсат қойғанын сенатор кездесуге қатысушылардың есіне салды. Сіздер осы оқу орнының қабырғасынан лайықты білім алып, Отанымыздың игілігі үшін бар күш-жігері мен білімін аямай жұмсайтын, жұрт мақтан етерлік нағыз құтқарушы маман болып шығасыздар, деді Жабал Ерғалиев.
КӨКШЕТАУ.
***
Парламент Сенаты Әлеуметтік-мәдени даму комитетінің төрағасы Ақан Бижанов Алматы қаласындағы Аймақтық диагностикалық орталығында болды.
Сенатор кездесу барысында диагностикалық орталық қызметкерлерімен Елбасы Нұрсұлтан Назарбаевтың Жолдауында және «Қазақстаның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» атты мақаласында көрсетілген әлеуметтік-экономикалық жаңғырту мәселелерін әңгімеге арқау етті.
Кездесуде Сенат депутаты денсаулық сақтау саласын дамыту мәселесіне ерекше назар аударылып, салаға бөлінетін қаражаттың жыл санап өсіп келе жатқандығын, «Саламатты Қазақстан» бағдарламасы жүзеге асырылып жатқандығына тоқталды.
Сондай-ақ, сенатор өткен парламенттік сессия барысында атқарылған істер туралы айта келіп, жүздесуге жиналған дәрігерлер қауымын толғандырып жүрген көптеген сұрақтарына жауап қайтарды.
АЛМАТЫ.
