«Париждегі турнир өте жоғары деңгейде өтті. Бұл бәсекеден маған күміс жүлде бұйырды. Екі жылдан бері жеңіс тұғырынан көріне алмадым. Яғни, бұл мені екі жыл күттірген медаль. Турнирде жалпы есебі жету кездесу өткізіп, финалда жапондық Сочи Хашимитоға есе жібердім. Әрине, барлық кездесу де оңай соққан жоқ. Бірақ мен үшін ең қиын белдесу жартылай финалда тәжік балуанымен өтті. Бір қуантатыны – ойлаған әдіс-тәсілдерімнің бәрі сәтті шықты. Париждегі бәсеке алдында Австрияда бірлескен оқу-жаттығу жиындарын өткіздік. Ал жарыс аяқталған соң Францияда үш күн жаттығу өткізіп, Мароккода өтетін Гран-при турниріне дайындаламын. Менің ең үлкен мақсатым – Олимпиада ойындарына лицензия алу. Біздің спортта лицензия алу үшін рейтингілік ұпайлар жинау қажет. Сол үшін тер төгемін. Жалпы, осы Grand Slam турниріне дейін екі жыл бойы медаль алған жоқпын. Спортшы үшін бұл оңай емес. Талай жарыстан құр қол қайтып, жанкүйерлерді де ашуландырып алдым. Бірақ маған сенімін жоғалтпаған бапкерлерге рахмет. Олар мен ұтылған сайын қатемен жұмыс істеуді үдете түсті. «Қанша уақытыңды жаттығуға сарп еттің, енді оң нәтиже болуы тиіс» деп жігерлендірді. Ендігі мақсатым – осы бабымнан таймай, жеңісті жолғы жалғастыру», - дейді Жансай Смағұлов.
