Сапар барысында Сауд Арабиясының Ғылым және инновация министрінің орынбасары жетекші оқу ордасының ғылыми-білім беру және инновациялық қызметімен танысты. Нассер Мұхаммед әл-Акил университет инфрақұрылымының ауқымдылығы мен дамуын ерекше атап өтті. Оның пікірінше, университеттің ғылыми жобалары мен орталықтандырылған зертханалары, әсіресе, жоғары технологиялар саласында заманауи талаптарға сай және кәсіби біліктілікті арттыруға барынша оңтайлы.
Сондай-ақ бірегей технопаркі пен суперкомпьютерлік базасы жасақталған заманауи халықаралық әл-Фараби ғылыми-технологиялық алқабын құру жобасы шетелдік қонақтың қызығушылығын тудырды. Құрылатын орталық IT-кластер ядросы бар әрі жаңа технологиялар мен инновацияларды дамыту саласында әлем университеттерінің ынтымақтастығының жаңа платформасына айналмақ. Министрдің орынбасары оны жүзеге асыруға Сауд Арабиясының университеттерін, сондай-ақ ғылыми-технологиялық алқап инфрақұрылымын дамыту мен зерттеу жобаларын қаржыландыру үшін инвесторлар тартуға дайын екендіктерін мәлімдеді.
Екіжақты мүдделілікті ескере отырып, тараптар коллаборация бағыттарын тыңғылықты талқылау үшін ҚазҰУ және Саудия Корольдігі университетінің мамандары мен ғалымдарынан жұмыс тобын құрды. Жақын арада ғарыштық технологиялар, IT және биотехнология, химия және физика, нанотехнологиялар және өзге де салалардағы жобаларды іске асыру бойынша бірлескен зерттеу орталықтарын құру жоспары белгіленді.
Мемлекет басшысының айрықша қолдауына ие болған әл-Фараби ғылыми-технологиялық алқабының жобасы ғылыми әзірлемелерді коммерцияландыруға және оларды экономиканың нақты секторына енгізуге бағытталған ұлттық инновациялық жүйенің бірегей өсу нүктесі болмақ.
АЛМАТЫ
