![Комиссияға сенім артамыз](/media/2020/02/11/abubakir.jpg)
Біз бірлікті, ауызбіршілікті, ынтымақты, сабырлықты ту еткен мемлекетпіз. Есе қайтару, өре түрегелу ешкімге абырой әпермейді. Бәрімізге сабырлық таныту қажет.
Өкінішке қарай, бұл оқиға жастар тәрбиесіне бейжай қарағанымызды көрсетті. Бұрын ауылымыз аралас, қойымыз қоралас мамыражай күн кешкен едік. Менің жас кезімде мұндай кикілжің болған емес. Мерекелерімізді бірге тойлап, тату-тәтті күн кештік. Алайда қазір жастар әлеуметтік желіден бұрыс нәрсе оқып, соның жетегінде кеткен сыңайлы.
Мемлекет басшысы Қасым-Жомарт Тоқаевтың қабылдаған шешімдерін толықтай қолдаймын. Президентіміз дер кезінде әрекет етіп, нақты тапсырмалар берді. Осындай келеңсіздікке жол берген лауазымды тұлғаларды қызметінен босатуын да құптаймын. Қордай оқиғасында Қасым-Жомарт Тоқаев тағы да бір мәрте өзінің кәнігі саясаткер, халықаралық деңгейдегі дипломат екенін дәлелдеді. Мемлекет басшысының жедел шешім қабылдауы жағдайды одан әрі ушықтырмай, ахуалды тұрақтандыруға зор үлес қосқаны анық.
Бұл оқиғаға кім кінәлі екенін дөп басып айту қиын. Қазіргі таңда Мемлекет басшысының тапсырмасымен құрылған Үкіметтік комиссия осы жағдайға байланысты тексеру жүргізіп жатыр. Онда келеңсіздіктің нақты себептері анықталып, кінәлілер табылатынына сенімдімін.
Еліміздің, халқымыздың бірлігі, ынтымағы бекем болсын!
Әбубәкір Войнце,
«Дүнгендердің қазақстандық қоғамы» қоғамдық ұйымының төрағасы