20-дан астам волонтерлар ұйымдарының өкілдері қатысқан кездесудің басты мақсаты – Мемлекет басшысы «Волонтер жылы» деп жариялаған биылғы жылы атқарылатын жұмыстардың жоспарын талқыға салу.
Алматы әкімі Бақытжан Сағынтаев атап өткендей, ізгі ниетті қалалықтар өмір сүрудің барлық салаларында белсенді және қала қауымдастығының ажырамас бөлігіне айналған.
Кездесу кезінде айтылған ұсыныстар – мейірімділіктің қалалық шеруін, экологиялық жүгіруді ұйымдастыру, қаланы жасылдандыруға қатысу, тұрғындарға құқықтық көмек көрсету және оқушылардың заңнамалық сауаттылығы бойынша сабақтар өткізу. Аз қамтылғандарға, жалғыз басты қарт адамдарға және ерекше қажеттілікті талап ететін балаларға көмек көрсетіледі. Сонымен қатар, волонтерлар донорлықты қолдайды әрі алғашқы медициналық көмек көрсетудің негіздерін үйретеді.
Қала әкімі Б. Сағынтаев волонтерлық жобалардың барлығының қолдау табатындығын айтты.
«Волонтерлық қозғалыс салиқалы әлеуметтік-жауапты іске айналуда. Сондықтан волонтерлар топтарын дайындауда бірыңғай ақпараттық база құру маңызды. Күш-жігеріміз бен ресурстарды біріктіре отырып, біз бұл міндеттердің барлығын шешеміз. Осы мақсат үшін волонтерлар мен қоғамның өзара іс-қимылының тиімді алаңына айналатын Волонтерлар үйін ашамыз», — дейді Бақытжан Сағынтаев.
Кездесуде «Қазақстан волонтерлар лигасы» ҚҚ-ның төрайымы Айсұлу Ерниязова, «Мейірімділер клубы» жобасының үйлестірушісі Динара Асанова, «Lider.kz» ҚҚ-ның үйлестірушісі Дильмира Блац, «Қуаныш сыйлаймыз» жобасының үйлестірушісі Кира Ударцева және басқалар өз ұсыныстарымен бөлісті.
