Алматы кезеңінің екі күнінде де көшбасшылық рөлді бермеген ресейлік Данил Иванов айналып келгенде ақтық финалда жеңімпаз атанды. Екінші орынды Дмитрий Хомицевич иеленсе, үздік үштікті Дмитрий Колтаков түйіндеді. Осылайша, биыл да ресейлік спортшылар «Медеу» мұз айдынында жүлделі үздік үштікті құрады.
«Біз Қазақстан үшін алтыншы, сондай-ақ, бесінші мерейтойлық финалдың аты аңызға айналған «Медеу» мұз айдынында өткеніне қуаныштымыз. FIM тректік комиссиясының жоғары талаптарына сай жинақталған тәжірибе мен қажетті инфрақұрылым және «Самұрық-Қазына» ұлттық әл-ауқат қорының әріптестік танытуы, Мәдениет және спорт министрлігі мен Алматы қаласы әкімдігінің қолдауы бізге FIM-мен ынтымақтастықты нығайтып, спидвейден әлем чемпионатының финалдарын өткізу құқығын иеленуге мүмкіндік берді» деді Қазақстан Автомотоспорт федерациясының президенті Марат Әбіқаев.
Алматыдағы әлем біріншілігінің кезеңінде жеті елден 18 «мұз гладиаторы» бақ сынады. Олардың ішінде Германиядан бір, Нидерландтан бір, Чехиядан бір, Аустриядан үш, Қазақстаннан үш және Швециядан төрт, Ресейден бес спортшы мұзды жолға шықты.
Мұздағы мотобәйгенің екінші күні қысқы спидвей шеберлері арасындағы нағыз тайталаспен есте қалды. «Мұз гладиаторлары» әрбір бұрылыста сопақ пішінді тректе бәсекелесіп, әр ұпай үшін тайталасты. Жексенбіде күн жылы болды. Бұл жарысқа да, жанкүйерлердің көңіл күйіне де оң әсер етті.
Алдын ала күткендей, жеке есептегі біріншіліктің басты фавориті – ресейлік мотожарысшылар финалдық кездесулердің қорытындысы бойынша жүлделі орындарға жайғасты. Алайда Аустриядан, Швециядан, Нидерландтан және Германиядан келген саңлақтар ресейліктерге дес бермей, мұзды жолда барын салды. Әсіресе, неміс Йохан Вебер мен швециялық Мартин Хаарахилтунен және додадағы әке мен ұл саналатын Никлас пен Стефан Свенссондарды айрықша атап өтуге болады.
«Медеудегі» мотожарысқа жан бітіріп, драматизм сыйлаған неміс мотошабандозы Йохан Вебердің кезекті бір айналымның бұрылысында мотоциклінен құлауы көрермендердің назарын аударды. Аустриялық Франц Цорнға соқтығысқан шабандоз жедел жәрдем арбасымен алаңнан әкетілді. Неміс гладиаторының батылдығына көрермендер орнынан тұрып қол соқты. Бұл оқиға осы спорт түріне тән сәттердің бірі, неміс шабандозы Алматыдағы емханалардың біріне жатқызылды.
Жиырмасыншы кезеңде бірден екі оқиға болды. Алдымен бұрылыста мотоциклді игере алмай, швед Ове Ледштрем мұзға құлады. Осы айналымда нидерландтық Джаспер Ивеманың да жолы болмады, ол мұз трассасының бұрылысында мотоциклмен бірге сальто жасап, жолдың жиегіндегі сабан қоршауға соқтығысып қана тоқтай алды. Қуанышқа орай, екі оқиғадан ешкім ауыр жарақат алған жоқ. Джаспер тіпті қорытынды баспасөз-конференциясына қатысып, өзінің әдемі құлауына қатысты әзілдеді.
Қазақстандық шабандоздар Владимир Чеблоков, Павел Некрасов және Сергей Серов спидвейден жеке әлем чемпионаты финалының қорытынды күнінің нәтижесінде финалда өте алмады. Қазақстандықтарға әлемдік спидвейдің шеберлерімен иық теңестіре күш сынасу әзірге оңайға соқпауда.
Екінші жарыс күнінің финалына төрт ресейлік спортшы дара шықты, олар – Даниил Иванов, Дмитрий Колтаков, Игорь Кононов және Дмитрий Хомицевич. Қажырлы күресте мәре сызығын бірінші болып қазіргі әлем чемпионы, бірінші жарыс күнінің жеңімпазы Даниил Иванов кесіп өтті.
Әлем біріншілігінің Алматыдағы кезеңіне жаңа серпін әкелген аустриялық мотожарысшы Харальд Симон болды. Бірінші сайыс күні үздік үштікті түйіндеген оның көзіне жас алғанын айта кеткен абзал. Бұл оның 1992 жылдан бері әлем біріншіліктеріндегі алғашқы жеңіс тұғыры еді.
Халықаралық Мотоцикл федерациясы (FIM) трек комиссиясының директоры Армандо Кастанья спидвейден жеке есептегі әлем чемпионаты финалы жоғары деңгейде ұйымдастырылғанын атап өтті.
– Халықаралық Мотоцикл федерациясының өкілдері, сондай-ақ, барлық мотошабандоздар Қазақстандағы додада бағын сынауға әрдайым асық. Себебі мұнда барлығы тиянақты ұйымдастырылған, қонақжайлықты атап өткенім де орынды. Біз алдағы уақытта Қазақстанның Автомотоспорт федерациясымен ынтымақтастықты жалғастыруға үміттенеміз, – деді Армандо Кастанья.
Қорытынды баспасөз мәслихатында Автомотоспорт федерациясының президенті Марат Әбіқаев бұл жарыстың Қазақстанда жалғасатынына сенім білдіріп: «Біз келесі жылы елімізде спидвейден Жеке есептегі әлем чемпионатының кезекті финалын өткізу туралы келісімге қол жеткіздік. Қазіргі таңда біз оны өткізуге арналған үш алаңды қарастырудамыз, бұл – «Медеу» мұз айдыны мен Алматыдағы «Сокол» трассасы, сондай-ақ, елордамыз Нұр-Сұлтан қаласында жарысты өткізу жоспары да бар», - деді.
АЛМАТЫ
